Header Nepal rastra bank Adv

मिसापाखें मिजंयात नं हिंसा जुइ, कानून दयेकेबलय् बिचाः याः – सांसद बिन्दा पाण्डे

नेवा: अनलाइन न्युज – ललेन्द्र शाक्य | २०७९ आषाढ ९, बिहिबार १२:४२:३५

नेकपा एमालेया सांसद बिन्दा पाण्डें मिसापाखें मिजंयात नं हिंसा जुइगु घटना खनेदूगुलिं थुकिया विषयस सोचेयायेमाःगु धाःगु दु ।

प्रतिनिधिसभा अन्तर्गतया कानून मानवअधिकार समितिया बैठकय् धारणा तसें सांसद पाण्डें यौन हिंसाया विषयस तःक्वःमछि हदम्याद अप्वयेकेगु कानून दयेकूगु लुमंकूसें मिजं हिंसाया विषयस नं सोचेयायेमाःगु ई वःगु धाःगु खः ।

सांसंद पाण्डें धाःगु दु, ‘हदम्यादयात ३५ न्हुनिसें खुलाया ईतक थ्यंकल, खुलापाखें दच्छि थ्यंकल, थुकिं नं मजिल, आः न्ह्याग्गु इलय् व न्ह्याम्हेस्यां नं उजुरी बिइ दइगु कथं न्यायया लुखा सदांया नितिं खुल्ला यायेनु, मिजंयात जूगु हिंसाया विषयस नं व्यवस्था यायेनु ।’

पाण्डेया कथं उजुरी लायेधुंकाः छानविन यायेबलय् जूगु छु खः ? लुइगु जूगुलिं हदम्याद तयेमज्यूगु पाण्डेया तर्क दु । सार्वजनिक पद धारण याःम्ह व्यक्तिया हकय् थुज्वःगु अपराध याःम्ह व्यक्तियात उज्वःगु पदय् तयेमज्यूगु जानकारी बिसें पाण्डें धाःगु दु, ‘उज्वःम्ह व्यक्तियात भविष्यय् नं छुं सार्वजनिक पदय् अयोग्य जुइगु व्यवस्था यायेनु ।’

पीडित पक्षयात राज्यं हे क्षतिपूर्ति बिइमाःगु न्ह्यथंसें सांसद पाण्डें शिक्षा, स्वास्थ्य, रोजगारीया ग्यारेन्टी व मचापिनिगु हकय् विचल्ली लाःसा पालनपोषणया भाला राज्यं कायेमाःगु प्रस्ताव याःगु दु ।

सांसद पाण्डें धाःगु दु, ‘पीडकयात कारवाही यायेधुंकाः उकिया बापतया वइगु जरिवाना पीडितयात बिइगुसिबें पीडितया आत्मसम्मानय् ठेस लायेफु, दां कयागु कि न्याय ? धैगु जुइफु । उकिं पीडितयात क्षतिपूर्ति राज्यकोषपाखें हे बिइमाः ।’

Categorized in राष्ट्रिय