नेवा: अनलाइन न्युज – ललेन्द्र शाक्य | २०८० आश्विन १, सोमबार ११:४८:१७

नेकपा एकीकृत समाजवादी पार्टीया सचिव लिसें पुलांम्ह मन्त्री रामकुमारी झाँक्रीं तीजया हिलावःगु स्वरुप इ व समाजया उपज जूगु धाःगु दु ।

झाँक्रीं धाःगु दु, ‘न्हापा मिसापिन्सं आर्थिक व सामाजिक अवस्था बांलाः मजू । लँपु, यातायात व संचारया व्यवस्था मदु । उकिं दँय् छक्वः थःछेँय् वनाः तीज न्यायेकीगु अले करुणा, व्यथा, विरहया म्ये हालेगु चलन दूगु खः । आः आपालं मिसात डायोस्पो बांलाः जू । भिडियो कल यानाः लाइभय् च्वनाः तीज न्यायेकेगु ई वल । थ्व ई व समाजया उपज खः ।’

समाजय् छगू लखया प्रतिस्पर्धा व देखासिकीया हुनिं नखःचखतय् विकृति वयाच्वंगु नं झाँक्रीं ध्वाथुइकूगु दु । वं धाःगु दु, ‘स्वीदँ न्ह्यः सामाजिक जागरण, संगठित जुइगु, विद्रोह व शिक्षा व चेतनाया म्येहाःगु खः । आः सांकेतिक रुपं अधिकारया खँ धायेम्वाल । समाजयात पुलांगु हे समाजय् दुःखय् वने धैगु खँ प्रगतिशील खँ मखु ।’

तीजं मुलुकया आर्थिक गतिविधि ह्वात्त हे थाहाँ वंगु झाँक्रीया टिप्पणी दु । झाँक्रीं धाःगु दु, ‘न्हापा न्हापा गामय् तीज वयेगु लच्छि न्ह्यःनिसें मादल थ्वइगु खः । आः होटल, पार्टी प्यालेस वा छेँय् लच्छि न्ह्यःनिसें न्यायेकी । थुकी आपालं चिन्ता यायेम्वाः । थुकिं मुलुकया आर्थिक गतिविधि थकयाः ब्यूगु दु । चुरा, पोते, सारी, नसात्वसां अर्थतन्त्र चलायमान दयेकूगु दु । उकिं विकृति जुल, म्ह्याय् मस्तसें अय्लाः त्वन धकाः आलोचना यायेगुसिबें नं सामाजिक सीमा व मर्यादाय् च्वनेनु । उत्सव व एकताया ल्याखं थुइकेनु ।’

तीजं फुक्क नेपाःमिपिन्त सांस्कृतिक एकताय् माःहनेफूगु झाँक्रीया धापू खः । झाँक्रीं धाःगु दु, ‘तीज सांस्कृतिक सद्भावया पर्व खः । थुकिं नेपाली एकतायात जीवन्त दयेकाबिइ । मधेसय् नं भव्यसभ्य कथं तीज न्यायेकी ।’

झाँक्रीं थः पशुपतिनाथ देगः दर्शनया नितिं मवंसां नं सिफल चौरय् गुल्मेली समाजं याइगु ज्याझ्वलय् सहभागी जुइगु धाःगु दु ।

Categorized in राष्ट्रिय