kmc bidya

मिडियाय् गलत समाचार सम्प्रेषणया ‘सूत्रधार’ प्रो. शर्मा, ‘मुर्गा’ जूम्ह पत्रकार पौडेल !

नेवा: अनलाइन न्युज – ललेन्द्र शाक्य | २०७७ बैशाख ३, बुधबार १०:५६:२१

–ललेन्द्र शाक्य

किपूया १० वडा तःननी त्वालय् प्वाथय् दुम्ह मिसा, वया भाःत प्रो. बैकुण्ठ शर्मा व वया म्ह्याय् यानाः स्वम्ह थः केहेँ बबिता आचार्य पौडेल बालं च्वनाच्वंगु कोथाय् वंगु चैत्र २६ गते एम्बुलेन्सपाखें थ्यंकूगु खः । सरकारं लकडाउनया इलय् छगू जिल्ला मेगु जिल्ला वनेत बन्देज तयातःगु इलय्, अझ धाये कि छगु पालिकां मेगु पालिका तकं वनेगुलि प्रतिबन्ध तयातःगु इलय् किपूया १० वडा तःननी त्वालय् थ्यंकूगु खः ।

सरकारं थःगु लागाय् पिनेच्वंपिं वल धाःसा अनिवार्य रुपं क्वारेन्टाइनय् च्वनेत आह्वान यानातःगु इलय् स्थानीय बासिन्दां न्हूपिं मनूत कोरोना भाइरस संक्रमणया रोकथामया नितिं थुज्वःगु संवेदनशील अवस्थाय् क्वारेन्टाइनय् च्वंवनेत इनाप याइगु स्वाभाविक खः, कर्तव्य व दायित्व नं खः । अझ धायेगु खःसा चैत्र २६ गते हे स्थानीय सरकार किपू नगरपालिकां थःगु लागाय् पिनेच्वंपिं मनूत च्वंवल धाःसा उपिं अनिवार्य रुपं क्वारेन्टाइनय् च्वनेत व छेँथुवाःलिसें स्थानीय समाजयात उपिं मनूतय्त क्वारेन्टाइनय् तयेयंकेगुलि पहल यायेत आह्वान यानाः नगरपालिकां आधिकारिक रुपं सुचं सार्वजनिक याःगु खः । वहे दिं अर्थात् चैत्र २६ गते जाजरकोटं उपिं मनूत किपूया १० वडा तःननी त्वालय् थ्यंकः वःगु खः । सरकारया आह्वानयात पालना यानाः थःपिनिगु कर्तव्य व दायित्व तायेकाः उपिं मनूतय्त क्वारेन्टाइनय् च्वंवनेत स्थानीय बासिन्दां इनाप याःगु खः । थ्व इनाप धैगु स्थानीय बासिन्दा नेपाल सरकारया आह्वानयात पालना याःगु खः । थथे सरकारया आह्वानयात स्थानीय बासिन्दा पालना याःगु यदि नकारात्मक खःसा थन सरकार दु कि मदु ? सरकारया शक्ति दु कि मदु ? धैगु थन न्ह्यसः ब्वलनी व ब्वलनाच्वंगु नं दु । लकडाउनया इलय् सरकारं याःगु आह्वान पालना मयायेगु खःसा जुयाच्वंगु लकडाउनया औचित्य छु जुल ले ?

किपूया १० वडा तःननी त्वालय् थः ससः केहेँ बालं कयाः च्वनाच्वंगु कोथाय् थः प्वाथय् दुम्ह कलाः व म्ह्याय् ब्वनाः च्वंवःम्ह प्रो. बैकुण्ठ शर्मा जाजरकोटया छगू कलेजया प्राध्यापक खःसा अनया प्राध्यापक संघया छम्ह उच्च पदय् च्वंम्ह पदाधिकारी नं खः । थुज्वःम्ह शिक्षित व्यक्तिं सरकारं आह्वान यानातःगु नियमया पालना यानाः थःहे स्वयं जागृत जुयाः न्ह्यज्यानाः क्वारेन्टाइनय् च्वंवने माःकि म्वाः ?

खँ थन राष्ट्रिय न्हिपौ नागरिक दैनिक व नागरिक अनलाइनय् पिदंगु ‘प्वाथय् दुम्ह मिसायात पितिन’ धैगु बुखँपाखें समाज आक्रान्त व आक्रोशित जुयाच्वंगु दु । थ्व सरासर झूठ खः । आः जुयाच्वंगु लकडाउनयात व सरकारया आह्वानयात स्थानीय जनतां पालना यानाः इमित क्वारेन्टाइनय् छ्वःगु जक खः ।

प्रो. बैकुण्ठ शर्मा जाजरकोटयाम्ह, नागरिक पत्रिका व नागरिक अनलाइनय् समाचार सम्प्रेषण याःम्ह पत्रकार दिलीप पौडेल नं जाजरकोटयाम्ह हे । थुलि जक मखु, जाजरकोटं अनुमति येँय् वयेत अनुमति ब्यूम्ह सहायक सिडिओ नं जाजरकोटयाम्ह हे पौडेल थरयाम्ह खः ।

थः मनू दु धैथें प्रो. शर्मां ‘पावर’ छ्यल । थः लिक्क लाःम्ह नागरिक दैनिक व नागरिक अनलाइनया जाजरकोटयाम्ह पत्रकार दिलीप पौडेलयात मखूगु झूठ गतिविधिया जानकारी बिसें पत्रकार पौडेलयात ‘मुर्गा’ दयेकेगु ज्या यानाः व थः उकिया सूत्रधार जुइत प्रो. बैकुण्ठ शर्मा ताःलात । प्रो. शर्मां अहमतां जाःगु पलाः छ्यूगुया दसि हे नागरिक पत्रिका व अनलाइनय् पिदंगु समाचार ‘झूठ व पीत पत्रकारिता’या दसिया रुपं बय् बय् जुल ।

नागरिकया पत्रकार दिलीप पौडेलं प्रो. बैकुण्ठ शर्मायाके खँ मन्यंकं समाचार दयेकी हे मखु । पौडेल छम्ह बरिष्ठ चेतनशील व उच्च ओहोदाया पत्रकार खः । थुज्वःम्ह पत्रकारं हावादारी रुपं समाचार सम्प्रेषण याइ हे मखु । प्रो. बैकुण्ठ शर्मां थःगु लागाया पत्रकार जूगु हैसियतं पत्रकार पौडेलयात मखुगु व झूठ गतिविधिया जानकारी बियाः थःके ‘पावर’ दु धैगु ध्वंगि घमण्ड व अहमता पूर्ति यायेगु नितिं समाचार सम्प्रेषण यात । सायद पत्रकार पौडेलं थुलि ताण्डव नृत्य प्रदर्शन जुइ धकाः वाः चायेकूगु खइमखु व थःत प्रो. शर्मां ‘मुर्गा’ दयेकेत्यंगु शायद मस्यूगु हे जुइमाः । पत्रकार पौडेलं नं प्रो. शर्मा थःगु लागाया मनू, मखूगु झूठ खँया जानकारी बिइमखु जुइ धकाः विश्वस्त जुयाः हे प्रो. शर्मां ब्यूगु जानकारीयात समाचार दयेकाः सम्प्रेषण याःगु हे बास्तविक घटना खः । आखिरय् वयाः पत्रकार दिलीप पौडेल थःगु हे लागाया गन्यमान्य व्यक्ति समाचार सम्प्रेषणया सूत्रधार प्रो. बैकुण्ठ शर्मापाखें ‘मुर्गा’ जुइमाःगु अवस्थाय् थ्यन, थःगु पत्रकारिताया ‘करिअर’य् हाकूगु दाग थाकेमाल । थुकियात पत्रकार दिलीप पौडेलया दुर्दशा वा थःगु तुतिं थःम्हं हे पां पालेगु ज्या जूगु तायेकेमाः ।

प्रो. शर्मां थके दूगु ‘पावर’ छ्यलाः स्थानीय सरकारयात तकं च्यालेञ्ज ब्यूगु दु ।

गथेकि, उगु १० वडाया वडाध्यक्ष अमन महर्जनं दिलोज्यान बियाः उपिं बालं च्वनाच्वंपिनिगु हित व भलोया नितिं सक्रिय रुपं सः थ्वयेकाः वयाच्वंगु खः । तर, प्रो. शर्मां वडाध्यक्ष छुं नं साथ मब्यूगु व न्वःमवाःगु खँ नागरिक पत्रकार पौडेलयात कंगु दु, वहे खँ पत्रकार पौडेलं समाचारय् सम्प्रेषण यात । थुलि जक मखु, प्रो. शर्मा किपूया स्थानीय सुरक्षा निकाययात तकं छ्यं क्वछुइेत बाध्य याःगु दु । थुज्वःगु संवेदनशील लकडाउनया इलय् सरकारं आह्वान याःगु क्वारेन्टाइनय् च्वं हे वनेमाःगु घोषणायात बेवास्ता यानाः ‘पावर’ छ्यलाः किपू लागां पिनेयापिं सलंसः व न्हयगः च्यागः भ्यानपाखें प्रहरी बल तैनाथ यायेहल । जबकि क्वारेन्टाइनय् तयेयंकेत स्थानीय सुरक्षा प्रशासनं हे अःपुक यायेफूगु ज्यायात ‘च्वं अडर बिइकाः’ प्रो. शर्मां स्थानीय सुरक्षा निकाययात लज्जित जुइमाःगु घेराय् तयाबिल ।

कोरोना भाइरस संक्रमण रोकथामया नितिं न्हिचा मधाःसें संक्रिय रुपं पलाः न्ह्याकाः वयाच्वंम्ह किपूया डिएसपी छेदीलाल कामतीया सामाजिक समाजसेवी पलाःयात तकं लुफिं हायेकाः बिइत ताःलात जाजरकोटे प्रो. बैकुण्ठ शर्मा ।

तर, असत्य गुबले बिजयी जुइमखु, सत्यया हे विजयी जुइ धैगु दसि हे नागरिक पत्रिका व अनलाइनय् पिदंगु झूठ समाचार खः । प्रो. बैकुण्ठ शर्माया अहमता जाःगु ध्वंगि शिक्षित बुद्धि पराजय जूगु दु । छम्ह पत्रकारयात पीत पत्रकारिता याकेगु ज्या व उम्ह पत्रकारयात ‘मुर्गा’या भूमिका निर्वाह याकेगु कासाय् थः सूत्रधार जुयाः सक्षम ला जुल, तर लिच्वः पराजय जुल, थःगु तुतिइ थःम्हं हे पां पालेमाल प्रो. बैकुण्ठ शर्मां ।  

किपू नगरपालिका १० वडाया वडाध्यक्ष अमन महर्जनं नागरिक दैनिक व नागरिक अनलाइनय् पत्रकार दिलीप पौडेलं सम्प्रेषण याःगु झूठ समाचारयात कयाः प्रेस विज्ञप्ति नं सार्वजनिक यायेधुंकूगु दु । सार्वजनिक जूगु विज्ञप्तिइ वडाध्यक्ष महर्जनं वास्तविक घटनायात स्पष्ट रुपं न्ह्यब्वयादीगु दु । वय्कलं गलत समाचार सम्प्रेषणयाइपिन्त ख्याच्वः तकं बियादीगु दु कि बास्तविक छु खः थुइकाः जक समाचार सम्प्रेषण यायेत ।

आः जाजरकोटया प्रो. शर्मालिसें प्वाथय् दुम्ह कलाः, थः म्ह्याय् व थः ससःकेहेँ किपू नगरपालिकां पलिस्था याःगु क्वारेन्टाइनय् च्वनाच्वंगु दु । प्वाथय् दुम्ह मिसायात आइसोलेशनय् तयाः माःगु चिकित्सक सेवा सम्बन्धित निकाय नं बिइमाः । वडाध्यक्ष अमन महर्जनं प्वाथय् दुम्ह मिसायात सुसाकुसाया नितिं सम्बन्धित चिकित्सकपिंन्सं स्वयाच्वंगु व परीक्षण यायेगु ज्या जुयाच्वंगु नं जानकारी बियादीगु दु । थुलि जक मखु नसात्वसा लिसें क्वारेन्टाइन व आइसोलेसन वार्डय् माःगु सकतां हलंज्वलं सुलभ रुपं उपलब्ध याकेगु कर्तव्य व दायित्व नं सम्बन्धित निकायया खः, व पूवंका बिइ नं माः ।

प्रो. बैकुण्ठ शर्माथें जाःपिं अहमवादीपिनिगु पं लिनाः नागरिकया पत्रकार दिलीप पौडेलथें मेपिं पत्रकार ‘मुर्गा’ जुइम्वालेमा धैगु सन्देश नं किपूया १० वडा तःननी त्वाःया लकडाउन क्वारेन्टाइनया घटनापाखें सकलसिनं वाःचायेकेमाः ।

(थन क्लीक यानाः किपू नपा १० वडाध्यक्ष अमन महर्जनया प्रेस वक्तव्य स्वयादिसँ)

Categorized in बिचा: