1142 nhoo dan adv

मिखां मखंम्ह मामं बुइ न्ह्यः खन थः मचायात

२०७२ जेठ ७, बिहिबार २१:१३:४५

ब्राजीलया छम्ह मिसा १७ दँ दुबलय् मिखां मखंगु खः । ततियाना गुयेरा आः ३० दँ दत व प्वाथय् दु । छगू प्रविधिया ग्वाहालिं थः मचाया ख्वाः व बुइ स्वयां न्ह्यः हे खंगु दु ।
थ्व प्रविधि अल्ट्रासाउंड तस्वीरया थ्रीडी प्रिन्टिङ खः । थ्व प्रविधिया ग्वाहालिं ततियानां थः मचाया ख्वाः स्वये खन, गुम्ह आः वया प्वाथय् दु । ततियानां थः काय्या नां मुरिलो तःगु दु । हगीज ब्राजील नाया कंपनीं दयेकूगु छगू शर्ट फिल्मय् थ्व खँ धयातःगु दु कि ततियाना गुयेरा विश्वया न्हापांम्ह मिखां मखंम्ह मां खः गुम्हेस्यां थ्रीडी प्रिंटिड अल्ट्रासाउंड इमेजिंग प्रविधिं बुइ न्ह्यः हे थः संतानया ख्वाः स्वयेफुगु खः ।
ततियाना थःगु प्वाथय् ब्वलनाच्वंम्ह मुरिलोया थ्रीडी अल्ट्रासाउंड तस्वीरयात थियाः वया ख्वाःया अंदाज याःगु खः । भीडियोय् ततियानां धाःगु दु कि मुरिलो बुइ न्ह्यः वलिसे नाप लानाः थःत तसकं लय्ताःगु दु । ब्राजीलय् हगीज कंपनीया निर्देशिका प्रिया पटेर्ल मां व भ्रूण दथुइ थुकथं भावनात्मक संबंध मचायात लसतां ब्वलनेत ग्वाहालि याइ धयादीगु दु ।