nepal investment baink

माल्दिभ्सया संसदय् सत्तापक्ष व प्रतिपक्षदथुइ ल्वापु

नेवा: अनलाइन न्युज – ललेन्द्र शाक्य | २०८० माघ १५, सोमबार १३:५६:२३

मालदिभ्सया संसदय् ल्वापु जूगु दु ।

विपक्षी व सत्तापक्षया सांसददथुइ जूगु ल्वापुइ लानाः सुं सुं सांसदपिं घाःपाः तकं जूगु दु ।

चीनलिसे निकट प्रधानमन्त्री मोहम्मद मुइज्जु नेतृत्वया गठबन्धन सरकारय् स्वम्ह मन्त्री व छम्ह महान्यायधिवक्ता नियुक्तिया प्रस्तावय् भारतलिसे निकट प्रमुख प्रतिपक्षी द मालदिभियन डेमोक्रेटिक पार्टी (एमडीपीं) विरोध प्वंकेधुंकाः ल्वापु जूगु खः ।

प्रस्तावित मन्त्रीपिनिगु नां संसदं पास यायेगु विषय हे ल्वापुया हुनि जूगु बीबीसीं जानकारी ब्यूगु दु ।

थ्व विवाद थुलि अप्वः तच्वः जुल कि सत्तापक्ष व प्रतिपक्षी दथुइ ल्हाः हे तयाः ल्वापु जुल । उगु ल्वापुइ लानाः सुं सुं सांसदया छ्यनय् तकं घाःपाः जूगु दु । छम्ह सांसदयात ला वासः यायेगु नितिं अस्पतालय् हे यंकेमाःगु दु । संसदय् जूगु उगु ल्वापुया भिडियो सामाजिक संजालय् भाइरल जूगु दु ।

माल्दिभ्सय् प्रोग्रेसिभ पार्टी अफ माल्दिभ्स व पिपुल्स नेशनल कांग्रेस (पीपीएम) व पीएनसीया गठबन्धन सरकार दु ।

“इण्डिया आउट” नारा बिसें चुनाव त्याकूम्ह मोहम्मद मुइज्जु प्रधानमन्त्री जुयाच्वंगु दु । मेखे माल्दिभ्सया विपक्षी दल भारतलिसे निकट दु । वर्तमान सरकारं भारतलिसे सम्बन्ध स्यंकूगु धासें विपक्षी दलं सरकारया कडा आलोचना यानाः वयाच्वंगु दु ।

माल्दिभ्सया मू विपक्षी दल मालदिभियन डेमोक्रेटिक पार्टी (एमडीपीं) सरकारं नियुक्त यायेत्यंपिं प्यम्ह दुजःया विरोध याःगु दु ।

एमडीपीं संसदय् मतदान जुइन्ह्यः हे मन्त्रिपरिषदय् नियुक्त यायेत्यंपिं प्यम्ह दुजःया प्रस्तावय् समर्थन मयायेगु निर्णय याःगु खः । वप्रति सत्तापक्षया सांसदपिन्सं विरोध प्वंकेधुंकाः वहे विवाद ल्वापुइ परिणत जूगु बीबीसीं जानकारी ब्यूगु दु । वधुंकाः मन्त्रिपरिषदया दुजःया नियुक्ति प्रस्ताव पास यायेगु विषयस भोटिङ जुइमखन ।

गठबन्धन सरकारं आवास, भूमि व शहरी विकासमन्त्री डा. अली हैदर, इस्लामिक मामिलामन्त्री मोहम्मद शहीद अली सईद, आर्थिक व व्यापार विकासमन्त्री मोहम्मद सईद व महान्यायाधिवक्ता अहमद उशमयात नियुक्त याये चाहेजूगु खः ।

Categorized in अन्तर्राष्ट्रिय