zero media family planning adv

मार्क्सवादीपाखें अध्यात्मवादी प्रम ओली : विशेष पूजाआजालिसें दर्शन पशुपति

नेवा: अनलाइन न्युज – ललेन्द्र शाक्य | २०७७ माघ १३, मंगलबार १२:३१:२१

प्रधानमन्त्री केपी शर्मा ओलीं पशुपतिनाथया दर्शन याःगु दु । जहान राधिका शाक्यलिसें ओली माघया सोमवाः लाकाः पशुपतिनाथया दर्शनया नितिं सुथय् हे थ्यंकूगु खः ।

माक्र्सवादं धर्मयात अफिम धाइ । तर, ओली धर्मय् कट्टर जुजुं वंगु दु । ओलीया अभिव्यक्ति धर्मगुरुया थें न्यनेदयाच्वंगु दु । कम्युनिष्ट नेता नास्तिक जुइ धैगु मान्यता दूगुलि ओलीं पशुपतिनाथया दर्शन याःगुयात अर्थपूर्ण कथं काःगु दु । वं लिपांगु ई आध्यात्मिक विचाःयात अप्वः बः बियाः वयाच्वंगु दु । ओलीं पशुपतिनाथया दर्शन यानाःमहत्वपूर्ण सन्देश बिइत्यंगु दु ।

नेकपा विभाजनलिपा धर्मयात स्वयेगु बारे निगू समुहया ब्यागलं दृष्टिकोण वयाच्वंगु दु । प्रचण्डं सार्वजनिक रुपं हे ओलीं धर्मनिरपेक्ष्यता क्वचायेकेत्यंगु धायेधुंकूगु दु । वं ओलीं गणतन्त्र व संघीयता तकं ध्वस्त यायेत्यंगु द्वपं बियाच्वंगु दु ।

ओलीं आध्यात्मिक विषययात जोडतोडं ल्ह्वनाच्वंगुलिं प्रचण्डया द्वपंयात सकारात्मक लिच्वः लाःवंगु दु । गुलिसिनं ओलीया आध्यात्मिक अभिव्यक्ति हिन्दु धर्मगुरुया थें वयेगु सुरु जूगु धयाः हयाच्वंगु दु । ओलीं ऋषिमुनिया खँ ल्हाइ, पूर्वीय दर्शन व चिन्तनया खँ ल्हाइ । थ्व छुं ऐतिहासिक पलाः छिइगु कथं ओलीया कुतःया रुपं तकं कयाहःगु दु ।

नेकपाया मेगु पुचः प्रचण्ड धाःसा धर्मनिरीपेक्ष्यताया पक्षपाती खः । वया हे बलं संविधानय् धर्मनिरीेपेक्ष्यता च्वःगु खः । थुकियात ओलीं मयेकूगु खः धैगु विश्लेषण नं जुयाच्वंगु दु । ओलीं गणतन्त्र व संघीयताया पक्षय् थः दूगु न्वःवाःसां नं धर्मनिरीपेक्ष्यताबारे न्वःवाःगु मदुनि । थ्व थःथवय् हे अर्थपूर्ण जू ।

ओलीं प्रतिनिधि सभा विघटन यानाः अतिकं आलोचना फयाच्वंगु दु । वया लोकप्रियता कुहाँ वःगु दु । तर, छुं वाः न्ह्यः जीन्यूजया सुधीर चौधरीयात अन्तर्वार्ता ब्यूबलय् ओलीं इतिहास व धर्म संस्कृतिया विषयस गथे न्वःवात उकिं हाकनं लोकप्रियता थहाँ वल । थुकियात ओली पक्षं लिट्मस टेष्टया रुपं काःगु दु । देसय् धर्मया मुद्दा महत्वपूर्ण जूगु भेऊ काःम्ह ओलीं थुकियात हे ज्वनेत स्वयाच्वंगु संकेत नं खनेदूगु दु ।

लिपांगु ई ओलीया धार्मिक ज्याझ्वलय् सहभागिता नं अप्वःगु दु । वं छुं वाः न्ह्यः जक किपूया बौद्ध धर्मावलम्बीया विहारय् थ्यंकाः न्वःवाःगु दु । धर्म संस्कृतिया खँ ल्हाःगु दु । थौं वयाः पशुपतिनाथया देगलय् थ्यंकाः विशेष पूजाआजालिसें दर्शन याःगु दु । ओलीया पशुपतिनाथ यात्रां अतिकं चर्चा परिचर्चा काःगु दु । वं थःत नास्तिक मजूसे आस्तिक क्यनेत स्वयाच्वंगु दु । कम्युनिष्टपिं नास्तिक जुइ धैगु मान्यतायात गलत सावित यायेत स्वयाच्वंगु दु ।

नेपाली कांग्रेसया नेता अमरेश सिंहं ओलीं विगतय् तत्कालीन भारतीय जनता पार्टीया विदेश विभाग प्रमुख राम माधवयात नापलानाः हिन्दु राष्ट्र हयेगु प्रतिबद्धता प्वंकुगु खुलासा याःगु खः । वं ठोकुवाया लिसें थ्व विषयस खँ ल्ह्वंगु खः । थुकिया बारे ओली व वया लिक्क लाःपिं सुनानं न्वःवाःगु मदु । ओलीया लिपांगु भूमिकां अमरेशया दावायात सकारात्मक लिच्वः लाःगु दु ।

ओलीं थःविरुद्ध क्ययेकुगु फुक्क अस्त्रयात थीथी अस्त्रं असफल यानाब्यूगु दु । आः ओलीयाके धर्मया मुद्दा नं अस्त्रया रुपं ल्यंदनी । ओलीं विगतय् दकले अप्वः आलोचना याःम्ह प्रचण्डलिसे नं ल्हाः मिलेयाःगु इतिहास दु । ओलीं छुं नं इलय् धर्मया मुद्दायात मल्ह्वनी धकाः धाये मफु । ओलीया आध्यात्मिक विषयपाखें जाःगु अभिव्यक्तित व लिपांगु ईया पशुपतिनाथया यात्रां थुज्वःगु हे संकेत खनेदयाः वयाच्वंगु दु ।

Categorized in बिचा: