coved ad

मापसे यानाः ज्यान काःम्ह कार चालक अनिश हमाल फरार, नक्कली चालक न्ह्यःने हल

नेवा: अनलाइन न्युज – ललेन्द्र शाक्य | २०७८ कार्तिक २२, सोमबार १३:१३:२८

ने.सं. ११४२ कछलाथ्व चौथि सोमवाः/कोहलपुरया हवल्दारपुरय् वंगु बहनी ८ ता इलय् छगः कार ब्वां वल । पसलं छेँय् लिहाँ वनाच्वंम्ह विनोद अधिकारीयात ठक्क नकल । अधिकारी मन्त । बागमती प्रदेश ०१–०२५च८८३९ ल्याःया कारधनी तकं जूम्ह चालक अनिश हमाल फरार जुल ।

प्रहरीं चच्छि कार चालकया मालेगु ज्या यात । घटनाबारे तत्काल अनुसन्धान न्ह्याकल । कार अनिश हमालया नामय् दूगु लुइकल ।

सुथय् तक कारधनी सम्पर्कय् मवल । थः कार चालक धासें छम्ह मिजं प्रहरीया न्ह्यःने वल । प्रहरीं अनुसन्धानया झ्वलय् चालक उम्ह मनू मजूगु लुइकल । कारधनी हमाल धाःसा आःतकं उपस्थित जूगु मदुनि ।

प्रहरीं प्रारम्भिक अनुसन्धानपाखें अनिश हमालं मादक पदार्थ सेवन यानाः अनियन्त्रित तरिकां कार चलेयाःगुलिं दुर्घटना जूगु सिइकूगु खः ।

बाँके प्रहरीया प्रवक्ता डिएसपी मधुसुदन न्यौपानें कार अनिश हमालं हे चलेयानावःगु प्रारम्भिक अनुसन्धानपाखें खनेदूगु धाःगु दु । वया मालेगु ज्या जुयाच्वंगु जानकारी ब्यूगु दु ।

डिएसपी न्यौपानें धाःगु दु, ‘आःतकया अनुसन्धानपाखें अनिश हमालं हे कार चलेयानावःगु खनेदु ।’ हमाल गिरफ्तारीइ लायेधुंकाः घटनाबारे अझ खुलस्त जुइ ।

अनिश हमालं चलेयानावःगु गाडी दुर्घटना जुयाः विनोद अधिकारीया ज्यान हे वनेधुंकाः प्रहरीया न्ह्यःने थः चालक धकाः दाबी याःम्ह मनूया बारे नं अनुसन्धान जुयाच्वंगु प्रवक्ता न्यौपानें धाःगु दु ।

डिएसपी न्यौपानें धाःगु दु, ‘मखुगु खँ ल्हाःगु खःसा थः चालक खः धाःम्हेसित नं अनुसन्धान यानाः कारवाही न्ह्यःने वनी ।’

दुर्घटना याकूम्ह अनिश हमालं मादक पदार्थ सेवन यानातःगु स्थानीयपिनिगु धापू दूगु प्रवक्ता डिएसपी मधुसुदन न्यौपानें धाःगु दु । वं धाःगु दु, ‘स्वास्थ्य जाँच यायेखंगु मदुनि, कारधनी हे फरार जूगुलिं गिरफ्तारीइ लायेधुंकाः यथार्थ खँ सीदइ ।’

लिपांगु ई दुर्घटना याकूम्ह व्यक्तिं मादक पदार्थ सेवन यानातःगु जूसा फरार जुइगु व मेम्ह व्यक्ति थनेहयेगु गतिविधि अप्वयाः वयाच्वंगु दु ।

लाइसेन्स मदूगु व मादक पदार्थ सेवन यानाः सवारीसाधन चलेयानाः व्यक्तिया ज्यान वनेगु कथं दुर्घटना याकूसा ज्यान काःगु अभियोगय् मुद्दा दायर याइ । उकिं नं चालक हे हिलीगु गतिविधि अप्वयाः वयाच्वंगु दु ।

Categorized in दुर्घटना-अपराध