2565 buddha Jayanti ADV

माधव नेपाल पक्षया गणेश पहाडी नं मन्त्री

नेवा: अनलाइन न्युज – ललेन्द्र शाक्य | २०७८ जेठ २७, बिहिबार १४:१५:५९

नेकपा एमालेया माधवकुमार नेपाल पक्षय् दुम्ह गणेश पहाडी मन्त्री जुइगु जूगु दु ।

प्रधानमन्त्री लिसें एमाले नायः केपी शर्मा ओलीं थौं बिहिवाः फोन यानाः मन्त्री जुइत प्रस्ताव तःगु खः । पहाडीयात संघीय मामिला व सामान्य प्रशासन मन्त्रालयया भाला ब्यूगु दु ।

पार्टी २०७५ जेठ २ गते लिहाँ वनेमाः धैगु मत तयाः वयाच्वंम्ह व नायः ओलीया लिपांगु वक्तव्यय् उकियात स्वीकार याःगुलिं मन्त्री जुइत तयार जूगु खँ पहाडीं धाःगु दु । वं धाःगु दु, ‘जेठ २ स लिहाँ वनीगु जुइधुंकाः जिं पार्टीं ब्यूगु जिम्मेवारी कायेत्यनागु खः ।’

सिन्धुलीपाखें निर्वाचित पहाडी माधव नेपाल पुचः दुने नं योगेश भट्टराई लिक्क लाःम्ह कथं काइगु खः । प्रतिनिधिसभा विघटन खारेज यायेत व नेपाली कांग्रेसया सभापति शेरबहादुर देउवायात प्रधानमन्त्री यायेत माग यासें सर्वोच्च अदालतय लाःगु रिटय् नं पहाडीं ल्हाःचिं तःगु मदु ।

Categorized in राजनीति