मातृभाषी संकिपाया सेन्सरलिसेंया प्रकृया अझं थाकुनि
नेवा: अनलाइन न्युज – निश्चल | २०७९ आषाढ २३, बिहिबार १८:१२:००
नेवाः संकिपामि पिनिगु संगठन नेवाः फिल्म सोसाईटीया ग्वसालय् स्वन्हु यंकं या भिडियोग्राफी कार्यशाला क्वचाःगु दु । नेवाः फिल्म सोसाइटीं यलया स्कूल अफ फिल्म मेकिङय् असार १९ निसें २१ तक न्ह्याकुगु भिडियोग्राफी सम्बन्धि कार्यशालाया समापन ज्याझ्वलय् सोसाइटीया नायः बिराजकाजी राजोपाध्यायं जानकारी बिउकथं थ्व कार्यशाला विशेष यानाः ल्यायम्हतय्त नेपालभाषा ख्यलय् दुकायेगु लक्षित याना ग्वसाः ग्वगु खनेदु ।
नेवाः फिल्म सोसाइटींवइगु श्रावण ६ गते नेवाः कलाकार मुना ज्याझ्वः यायेत्यनागु व उगु हे ज्याझ्वलय् स्वंगू महत्त्वपूर्ण विषय घोषणा यायेत्यनागु जानकारी नं नायः राजोपाध्यायं बियादिल ।मंगलबाः जूगु कार्यशालाया समापन ज्याझ्वलय् आदिबासी जनजाति चलचित्र महासंघया नायः अमृत सुनुवारं सहभागीतयत दसिपौ लःल्हानादिल ।
ज्याझ्वलय् न्ववासें नायः सुनुवारं महासंघया हे पहलय् मातृभाषी संकिपाया निर्माण इजाजत कायेत चलचित्र विकास बोर्डय् छुं सहुलियत सुविधा कायेखंसां मातृभाषी संकिपाया नितिं सेन्सरलिसेंया प्रकृया अझं झन्झटं जाःगु धयादिल ।
मातृभाषी संकिपाया लागिं बिस्कं हे आदिवासी जनजाति चलचित्र सेन्सर बोर्ड गठन यायेत अथवा आःया सेन्सर बोर्डया संरचनाय् मातृभाषी संकिपाया लागिं बिस्कं ढाँचा दयेकेत थःपिन्सं माग यानावयागु सुनुवारं जानकारी बियादिल ।
सोसाईटीया निवर्तमान नायः लुःजः सिंहं कार्यशालाय् सयेकागु सीपयात छ्यलाः समुदाययात लबः बीत प्रशिक्षार्थीतयत इनाप यानादिल । उगु कार्यशालाय् मुक्कं झिम्हेसित प्रशिक्षक बिशाल राजभण्डारीं प्रशिक्षण बियादीगु खः । ज्याझ्व नेवाः फिल्म सोसाइटीया कोषाध्यक्ष सुनीता श्रेष्ठं न्ह्याकादीगु खः ।
Categorized in कला