city axpris 2

मातृभाषा पत्रकारिता शताब्दी तःजिक हनेगु घोषणा

नेवा: अनलाइन न्युज – विजयरत्न | २०८० माघ २२, सोमबार १०:५५:४५

नेवाः पत्रकार राष्ट्रिय दबू यलया गुक्वःगु दँमुज्या आइतवाः क्वचाःगु दु ।

उगु ज्याझ्वलय् मूपाहाँ कथं पत्रकार दबूया केन्द्रीय नायः नृपेन्द्रलाल श्रेष्ठं त्वाःदेवाय् मत च्याकाः उलेज्या यानादीगु खः । उलेज्या लिसेलिसें सत्यनारायण बहादुर श्रेष्ठ व धर्मादित्य धर्माचार्यया किपातय् स्वाँमाः देछानादीगु खः।

यल शाखाया नायः मन्जु बज्राचार्यया सभानायःसुइ जुगु उगु ज्याझ्वलय् विशिष्ट पाहाँ कथं यल महानगरपालिका १६ वडाया वडानायः निर्मलरत्न शाक्य व पत्रकार दबूया निवर्तमान नायः सुरजबीर बज्राचार्य, दबूया सल्लाहकार बिजयरत्न असंबरे व यल शाखाया सल्लाहकार सुरेश प्रधान पाहाँ कथं झायादीगु खः।

पत्रकार दबूया केन्द्रीय नायः नृपेन्द्रलाल श्रेष्ठं पत्रकार दबू नं थ्वहे वइगु स्वाँया पुन्हिखुन्हु नेपालय् दकलय न्हापां  मातृभाषाया पत्रिका पिहावःगु दिंयात लुमंकाः मातृभाषा पत्रकारिता शताब्दी दिवस हनेगु खँ न्ह्यथनादीगु खः। धर्मादित्य धर्माचार्यं नेपाल सम्बत १०४३ य् ‘बुद्धधर्म व नेपालभाषा’ नामय् पत्रिका पिकाःगु दिंयात कया पत्रकार दबू नं दच्छियंकं थीथी ज्याझ्वः याना हनीगु जुइ धकाः धयादीगु खः। वयकलं सच्छि दँ दुने पिहावये धुंकुगु पत्रिका संग्रह दुगु सफू नापं नेपालभाषाया पत्रिका, रेडियो, टेलिभिजन व अनलाइन पत्रिकाया विवरण नापं धर्मादित्यनिसे आःतक पत्रकारपिनिगु धलः दुगु सफू पिकायेगु नं ग्वसाः दु धकाः धयादीगु खः।

उगु ज्याझ्वःपाखें नेपालभाषाया इतिहास खनेदइगु कथं छगू तःजिक ज्या जुइ धकाः श्रेष्ठं धयादीगु खः । अथेहेतुं वयकलं मातृभाषा पत्रकारितायात कया सार्क स्तरया अन्तराष्ट्रिय सम्मेलन यायेगु ग्वसाः न दूगु खँ कनादिल ।

ज्याझ्वलय् बिशिष्ट पाहाँ यल महानगरपालिका १६ वडानायः निर्मलरत्न शाक्यं पत्रकार दबू नं यानाः वयाच्वंगु ज्या तसकं बांलाः जू धकाः धयादिसें दबू न हनेत्यंगु मातृभाषा पत्रकारिता शताब्दी दिवसया ज्याय् ग्वाहालि यायेगु बचं न बियादिसें दबू नं याइगु राष्ट्रिय व अन्तर्राष्ट्रियस्तरया ज्याझ्वलय् थःगु वडापाखें माःगु ग्वाहालि यायेगु जुइ धकाः धयादिल ।

अथेहे दबूया निवर्तमान नायः सुरजबीर बज्राचार्य, सल्लाहकार बिजयरत्न असंबरे व यल शाखाया सल्लाहकार सुरेश प्रधानपिन्स गुक्वःगु दँमुँज्या सुथां लाक्क न्ह्याये फयेमा नापं दबूपाखें याइगु ज्याझ्वलय् थःपिन्स माःगु कथं ग्वाहालि यायेगु धकाः धयादीगु खः।

उगु दँ मुज्याय् केन्द्रपाखे बरिष्ठ उपाध्यक्ष सुनिल महर्जन, उपाध्यक्षपिं रचना श्रेष्ठ व सुरेन्द्रभक्त श्रेष्ठ, सचिव राजु नापित नापं दुजःपि अनुप प्रधान, मीना बज्राचार्य, राजेश बज्राचार्य व विकास मालीया नं ब्बति दुगु खः।

उगु दँमुँज्याय् यल शाखाया छ्यान्जे पूर्णिमा शाक्यं प्रगति विवरण न्ह्यब्बयादीगु खःसा दाँभरी कल्पना महर्जनं आर्थिक प्रतिवेदन न्ह्यब्वयादीगु खः।

Categorized in नेवाः