zero media family planning adv

मातृभाषा पत्रकारिता दिवसया ज्याझ्वः लकडाउनया हुनिं स्थगित

नेवा: अनलाइन न्युज – विजयरत्न | २०७७ बैशाख २३, मंगलबार १९:४१:५५

नेवाः पत्रकार राष्ट्रिय पत्रकार दबूया ग्वसालय् न्यादँ न्ह्यःनिसें न्ह्यानाः वयाच्वंगु धर्मादित्य धर्माचार्यया लुमन्तिइ थुगुसिइ न्याक्वःगु मातृभाषा पत्रकारिता दिवस हनेगु नितिं उत्साहित जुयाच्वंपिं सकलसिगु न्ह्यःने लूगु कोरोना संक्रमण जोखिम व उकिं सुरक्षित जुइगु नितिं लकडाउनया पालना यासें पत्रकार दबूपाखें नेतृत्व यानाः वयाच्वंगु र्याली(जुलुस) व धर्मादित्य धर्माचार्यया झ्वाताय् स्वां देछायेगु, सभा व मातृभाषा पत्रकारिता सम्मेलन स्थगित जुउगु खँ पत्रकार दबूपाखें छगू विज्ञप्ति सार्वजनिक यासें स्थगित याःगु दु । उकिया नापनापं पत्रकार राष्ट्रिय दबूया यल कचापाखें लःल्हाइगु धर्मादित्य पत्रकारिता सिरपाः थुगुसी निरन्तरता बीगु तातुना कथंया ज्याझ्वः मजुइगु नं उगु विज्ञप्तिइ न्ह्यथनातःगु दु । 

नेवाः पत्रकार राष्ट्रिय दबूया केन्द्रिय नायः सुरजबीर बज्राचार्यं ल्हाःचिं तयातःगु उगु विज्ञप्तिइ च्वयातःकथं थ्यंमथ्यं छगू शताब्दि न्ह्यः नेपालभाषा पत्रकारिता न्ह्याःगु बछलाथ्व १४ यात मातृभाषा पत्रकारिता ख्यलय् दकले न्हापांगु घटनाकथं कयातःगु दुसा नेपालभाषाया न्हापांम्ह पत्रकार धर्मादित्य धर्माचार्य (जगतमान वैद्य)या बुदिं लाकाः हनेगु ज्या न्ह्याःगु थुगु दिवस थीथी मातृभाषी पत्रकारतय्गु नितिं नं छगू समर्पण, छगू उर्जा जुयाः न्हापांम्ह मातृभाषी पत्रकार नालाः थुगु दिवस हनेगु ज्याया न्ह्यलुवाः नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबू खःसा थुकी एकमत आदिवासी जनजाति पत्रकार महासंघ आवद्ध सकल भाषाभाषी पत्रकारतय्गु संगठननाप मधेसी पत्रकार समाजं क्यंगु दु ।

ने.सं. १०४५ स्वांया पुन्हि खुनुनिसें भारतया कलकत्ताय् च्वनाः ‘‘बुद्धधर्म’ नांया धार्मिक पत्रिका पिकयाः वया निदँ लिपा थुगु पत्रिकायात हे ‘बुद्ध–धर्म व नेपालभाषा’ धकाः धर्म व साहित्यया पत्रिका सम्पादन याःम्ह धर्मादित्य धर्माचार्य ने.सं. १०२२ बछलाथ्व चतुर्दशीखुन्हु सप्तपुर महाविहार, चिकंबही, यलय् जन्म जुयादीम्ह ब्यक्तित्व खः । अनन्त जीवन दुम्ह वय्कःया भौतिक शरीर थुगु भूमिं बिदा काःगु ने.सं. १०८३ दिल्लागा अमाई खुन्हु खः । वय्कलं खय्भासं ‘हिमाली बौद्ध’, ‘अंग्रेजीं ‘बुद्धिष्ट इण्डिया’ पत्रिका नं पिथनादीगु खः ।

वय्कःया योगदान आपालं ख्यलय् दुगु लुमंकेबलय् वय्कःयात देछानातःगु पदवी एम. ए. हिन्दी साहित्य रत्न, बौद्ध साहित्य रत्न, एफ.आर. इकन (लण्डन), धर्म आदित्य, सद्धर्मरत्नाकर, एफ.बि.एम. (बर्मा), कविराज, भिषगरत्न, भिषगारत्न, डी.डी.(होमियो) नं लुमंके माःसा वय्कःयात नेपाःया बौद्ध जगतया न्हापांम्ह सुधारवादी ब्यक्तित्व, किन्दो विहारया जीर्णोद्धारया मुख्यम्ह आयोजक, नेपालय् स्वांयापुन्हिखुनु बुद्ध जयन्तीकथं हनेगु थिति हःम्ह, नेपाःगालय् बुद्धधर्म उद्धार संघ, बुद्धोपासक संघ, बुद्धोपासिका संघ दयेकूम्ह, कलकत्ताय् नेपाली बुद्धमार्गी संघ दयेकूम्ह, दार्जिलिंगय् छगू कन्या विद्यालय चायेकूम्ह, कालिम्पोंगय् उपासक संघ दयेकाः पुस्तकालय तःम्ह, कलकत्ता व पटनाया विश्वविद्यालयस नेपालभाषा दुकायेत कुतः याःम्हथें जाःगु आपालं ज्यानाप वय्कःया गुण थौं नं सकसिनं लुमंकेगु याः ।

थौं संचार ख्यःयात राज्यया प्यंगूगु अंग कथं मान्यता बियातःगु दुसा समाजं नं उत्तिकं हे मान ब्यू धकाः विशेष उल्लेख यानातःगु उगु विज्ञप्तिइ नेपाः देसय् जक मखु संसारय् हे वःगु ततःधंगु ह्यूपालय् संचार ख्यः छगू शक्ति जुयाः उर्जा तनाबीगु थुइके थौं थाकु मजुइधुंकल धकाः धासे थौंया उपलब्धिया खँ न्ह्यथनेबलय् सदां नं न्हापांम्ह मातृभाषी पत्रकार धर्मादित्य धर्माचार्य व वय्कलं मातृभाषा पत्रकारिता ख्यलय् दयेकादीगु आधार “बुद्धधर्म व नेपालभाषा” लुमंकेमाः धकाः च्वयातगु दु । वय्कःया कर्म व योगदानयात राज्य नं म्हसीकेमा अले न्हापांम्ह मातृभाषी पत्रकारकथं वय्कःयात मान बीमाः व वय्कलं थुइकादीगु मातृभाषा पत्रकारिताया महत्वयात आत्मसात् याये हे माः धकाः बःबियातःगु दु ।

पत्रकार दबूया विज्ञप्तिइ च्वयातः कथ आःयात संक्रमणया ईया हुनिं स्थगित जुउगु मातृभाषा पत्रकारिता सम्मेलन व धर्मादित्य पत्रकारिता सिरपाः ई अनुकूल जुइवं ग्वसाः ग्वइगु खँ पिहाँ वःगु दु ।

Categorized in नेवाः