prabhu baink new

मातृभाषां शिक्षाय् अधिकार सुनिश्चित यायेत खः – दिपक तुलाधर

 संघीय गठबन्धन आन्दोलन नेवाः ऐक्यबद्धताया इनापय् मांभाय् शिक्षा–जनचेतना ¥याली पुचःया संयोजक लिसें नेवाः वस्ती नेवाः स्कूल अभियानया कजि दीपक तुलाधरं कन्हय् मंगलवाः अगष्ट ९ तारिख २२ क्वःगु विश्व आदिवासी दिवस नेवाःतय्गु पाखें बिस्कं कथं तःजिक न्यायेकेगु नितिं सकतां कथंया तयारी क्वचायेधुंकुगु जानकारी बियादीगु दु ।

नेवाः अनलाइन न्युजलिसे जूगु खँल्हाबल्हाया झ्वलय् वय्कलं धयादी, ‘ ‘कन्हय् मंगलवाःया ज्याझ्वः बिस्कं कथंया ज्याझ्वः जुइ ।’ वय्कःलिसे जूगु खँल्हाबल्हाया सारसंक्षेप थन न्ह्यब्वयाच्वना । –संं.

कन्हय् मंगलवाःया ज्याझ्वः गुकथं तयारी जुयाच्वंगु दु ?
–    लगभग तयारी क्वचायेधुंकूगु दु । विशेष रुपं कन्हय् मंगलवाः २२ क्वःगु विश्व आदिवासी दिवस, उकिसनं थुगु दँय् ‘आदिवासीपिनिगु मांभाय् शिक्षायात अधिकार’ धैगु नारा दूगु जूगुलिं थ्व दँया आदिवासी दिवस झीगु नितिं अतिकं महत्वपूर्ण जूगु दु । झीसं नं नेवाः भासं ब्वनेदइगु अधिकार सुनिश्चित यायेगु नितिं आन्दोलन यानाः वयाच्वनापिं खः । उकिं थ्व ज्याझ्वलय् झीगु सक्रिय सहभागिता व सरोकार क्यने हे माःगु दु ।
कन्हय् मंगलवाःया ज्याझ्वः गुकथं न्ह्यायेत्यंगु दु ?

–    ज्याझ्वः यायेगु थाय् झीसं यलया यलध्वाखा ल्ययागु जुल । अनं ¥यालीलिसें झीपिं यलया पूच्वय् च्वंगु संयुक्त राष्ट्रसंघया ज्याकुथिइ वनाः ज्ञापन पौ लःल्हायेगु खः । ज्याझ्वः थुलि हे खःसां ज्याझ्वःया महत्व धैगु दकले न्हापां थुगु ¥यालिइ स्कूलया ब्वनामिपिं लिसें अभिभावकपिं, भाषासेवीपिं लिसें नेवाः आन्दोलनय् सक्रिय रुपं न्ह्यलुवाः जुयाः ज्या यानाच्वंपिं व्यक्तिपिनिगु सहभागिता दइ । अथेहे, मेगु महत्वपूर्ण ज्याझ्वः धैगु आदिवासी दिवसया लसताय् मांभासं ब्वने दयेमाः धैगु नारालिसें जुइगु ¥यालीया बिस्कं कथंया महत्व दूगुया लिसेलिसें संयुक्त राष्ट्रसंघं हे थ्वपालय् ब्यूगु नारा आदिवासीतय्गु शिक्षा अधिकार धैगु विचाःयात साकार यायेगु नितिं झी नेवाःतसें नं ऐक्यबद्धता क्यन धैगु ज्याझ्वः खः । मेता थ्व ज्याझ्वलं सरकारयात नैतिक रुपं दबाब लाकेफइगु ज्याझ्वः नं खः । उकिं कन्हय् मंगलवाःया ज्याझ्वः जिं स्वयेबलय् अतिकं महत्वं जाः ।

कन्हय् मंगलवाःया ¥यालिइ गुलि सहभागिता दइ ?

–सहभागिताया ल्याखं २५–२६ गू ब्वनेकुथिया विद्यार्थीपिन्सं ब्वति कायेत्यंगु दु । अथेहे, यलया भाषासेवी, साहित्यकारपिन्सं ब्वति कायेत्यंगु दु । अथेहे, येँपाखें नं नेवाः ऐक्यबद्धताय् आबद्ध नेवाःतसें व भाषिक संघसंस्थापिन्सं ब्वति कायेत्यंगु दु । थ्व ल्याखं स्वयेगु खःसा कन्हय् मंगलवाःया सहभागिता बांलाइगु खनेदु । तर भतीचा कन्हय् विदा मदूगु न्हि व स्कूलय् नं जाँच दूगु हुनिं यानाः छुं भच्चा अलमल ला दु, तर नं ज्याझ्वः बांलाक्क हे ताःलाइगु खनेदु ।

संयुक्त राष्ट्र संघयात छिक्पिन्सं लःल्हायेत्यनागु ज्ञापन पतिइ छु छु खँ न्ह्यथना दियागु दु ?
–ज्ञापन पतिइ मू खँला संयुक्त राष्ट्र संघं हे थ्वपालय् आदिवासीपिनिगु शिक्षा अधिकार धकाः ब्यूगु नारा ताःलाके माल  । व नेपालय् आदिवासी जनजातिपिन्सं थःगु भासं शिक्षा कायेगु अधिकार दयेमाल धैगु खँ हे न्ह्यथना तयागु दु । झीसं यायेत्यनागु मात्र थ्वहे खः कि, संयुक्त राष्ट्र संघं ब्यूगु नारा नेपालय् नं पालना जुइमाल व पालना याकेमाल धैगु दबाब बिइत खः । संयुक्त राष्ट्र संघं हे नेपाल सरकारयात थ्व मुद्दायात कयाः सहलह यात धाःसा झीसं धयाच्वनागु मातृभाषा शिक्षाया अधिकारया माग पूवनी धैगु आशा खः । उकिं कन्हय् मंगलवाःया ज्याझ्वः मुकं मातृभाषां शिक्षाया अधिकार सुनिश्चित यायेगु अधिकारया नितिं जुइत्यंगु ज्याझ्वः खः ।
 
अन्तय् छुं धयादी ?

–दकले न्हापां ला, कन्हय् मंगलवाः सुथसिया ९ ता इलय् यलध्वाखाय् मुनादीत इनाप याना । मेता धैगु झीसं न्हापांनिसें ल्ह्वनाच्वनागु माग पूवंकेगु नितिं न्हूकथंया लँपु ज्वनाः वनेमाः उकिं थ्वपालय् आदिवासी दिवसय् संयुक्त राष्ट्र संघं ब्यूगु नारा झी सकसिगु सः जूगुलिं थुकियात च्यूताः प्वंकाः झीसं सरोकार क्यनेनु, संयुक्त राष्ट्र संघपाखें नं नेपाल सरकारयात सचेतना यायेगु नितिं बः बिइनु धैगु खः ।