zero media family planning adv

माघ १४ व १५ गते रोजगार मेला, थौं पत्रकार सम्मेलन

नेवा: अनलाइन न्युज – राजीव राजोपाध्याय | २०७६ माघ १२, आइतबार १६:४५:०३

प्राविधिक शिक्षा तथा व्यावसायिक तालीम परिषद, बालाजु स्कूल अफ इन्जिनियरिङ्ग एण्ड टेक्नोलोजीं रोजगारी मेला २०७६ या ग्वसाः ग्वःगु जानकारी थौं आइतवाः छगू पत्रकार सम्मेलन यानाः जानकारी ब्यूगु दु ।

आःतकया दुने १२,००० म्हं मल्याक्क विद्यार्थीपिन्त सुथांलाक्क तालीम बियाः स्यल्लाःपिं विद्यार्थी कथं उत्पादन यायेधुंकूगु उगु परिषदं थौं जूगु पत्रकार सम्मेलनय् छगू प्रेस विज्ञप्ति नं सार्वजनिक याःगु दु ।

उगु प्रेस विज्ञप्तिइ बालाजु स्कूल अफ इन्जिनियरिङ्ग एण्ड टेक्नोलोजी नेपाःया हे प्वाइनीयर प्राविधिक शिक्षालय खः धकाः धासें व सीटीइभीटीया आंगीक शिक्षालय खः धकाः धयातःगु दु ।

विज्ञप्तिइ उगु स्कूल २०१८ सालय् पलिस्था जूगु व पलिस्थाकालनिसें हे शिक्षालयं मेकानिकल, इलेक्ट्रिकल, सिभिल, स्यानिटरी (प्लम्बिङ्ग), अटोमोबाईल लिसेलिसें मेमेगु विषयस मध्यमस्तरया प्राविधिक जनशक्ति उत्पादन यानाः वयाच्वंगु खँ नं न्ह्यथनातःगु दु ।

सार्वजनिक याःगु विज्ञप्तिइ धयातःगु दु, ‘बिएसइटी राष्ट्रया नितिं माःगु टीभीइटी क्षेत्रया योग्य दक्ष जनशक्ति उत्पादन यायेगुलि उत्कृष्ट शिक्षालय खः थ्व । राष्ट्रिय व अन्तर्राष्ट्रिय श्रम बजारया नितिं कुशल व दक्ष प्राविधिक जनशक्ति उत्पादन यानाः सेवा बियाः वयाच्वनागु दु । थुगु शिक्षालयं थ्वहे वइगु माघ १४ व १५ गते प्राविधिक एसएलसी व डिप्लोमा इन्जिनियरिङ्गया प्रशिक्षार्थीपिन्त लक्षित यानाः प्राविधिक रोजगार मेला (टेक्निकल जब फेयर) या ग्वसाः ग्वयागु दु । उगु रोजगार मेलाया मू आज्जु धैगु प्राविधिक जनशक्ति व उद्योगीपिं रोजगारदाता दथुइ थःथवय् म्हसीका कालबिल यायेगु खः । रोजगार मेलापाखें प्राविधिक जनशक्तियात थःम्हं स्यूगु सीपया छ्यलाबुला यायेत उद्योगतय्के रोजगाया ह्वःताः चूलाकेगु खः । अथेहे, उद्योगी ब्यवसायीपिन्सं छगू हे छत्रछायाँपाखें थःपिन्त माःगु कथंया मध्यमस्तरया प्राविधिक जनशक्ति ल्ययाः ज्याय् छ्यलेगु ह्वःताः कायेखनी ।’

उगु मेला बालाजु स्कूल अफ इन्जिनियरिङ्ग एण्ड टेक्नोलोजी बालाजु औद्योगिक क्षेत्रय् जुइत्यंगु खः । उगु ज्याझ्वलय् नेपाः टप, सिप्रदी, अशोक ली लेडm पञ्चकन्या, यूनाइटेड वायर व केबलथें जाःगु २५ गू प्रतिष्ठित उद्योगया उपस्थिति दइगु जानकारी नं विज्ञप्तिइ न्ह्यथनातःगु दु ।

अथेहे रोजगारदातापिन्सं थुगु हे दँ पास याःपिं, विगतय् ज्याया अनुभव दुपिं लिसें थीथी क्षेत्रय् ज्या यानाच्वंपिं प्रशिक्षार्थीपिन्त ल्ययेगु ह्वःताः नं कायेखनीगु खँ न्ह्यथंसें उगु क्षेत्रय् प्राविधिक एसएलसी व डिप्लोमा सिभिल, मेकानिकल, अटोमोबाईल, इलेक्ट्रीकल व स्यानिटरी विषयया विद्यार्थीपिन्सं ब्वति काइगु जूगु खँया जानकारी नं विज्ञप्तिइ बियातःगु दु सा उगु ज्याझ्वलय् भ्रमण यायेत थ्यंमथ्यं द्वःछिसिबें अप्वः मध्यमस्तर प्राविधिकपिनिगु ग्वाहालि जुइगु खँया जानकारी नं बियातःगु दु ।

सार्वजनिक याःगु विज्ञप्तिइ उगु ज्याझ्वःयात क्यानाडा सरकारया थीथी संघसंस्थां प्रायोजन याइगु लिसें सिद्धार्थ बैंक, एनएमबी बैंक व माछापुच्छ«े बैंकं ग्वाहालि याइगु खँया जानकारी नं बियातःगु दु । अथेहे, उज्वःगु ज्याझ्वः विगत स्वदँ न्ह्यःनिसें यानाः वयाच्वनागु जानकारी नं विज्ञप्तिइ बियातःगु दु ।

वइगु माघ १४ व १५ गते निन्हुयंकं जुइगु रोजगार मेलाया प्रचारप्रसारया नितिं जूगु थौं आइतवाःया पत्रकार सम्मेलनय् परिषदया उपप्रमुख शंकरमान श्रेष्ठं लसकुस न्वचू ब्यूगु खःसा निमित्त शिक्षालय प्रमुख बैकुण्ठ श्रेष्ठं जब फेयरया विषयस स्लाइड प्रेजेन्टेशन याःगु खः ।

अथेहे, प्रेस विज्ञप्ति जब प्लेस्मेन्ट एण्ड काउनसेलिङ्ग युनिटया टिम लिडर शिव कारञ्जितं सार्वजनिक याःगु खःसा ज्याझ्वलय् थीथी संचारमाध्यमया पत्रकारपिंलिसें सहलह व न्ह्यसः लिसः नं याःगु खः ।

Categorized in लजगाः