coved ad

माओवादी केन्द्रीय ज्याकुथिया निम्ह बाहेक फुक्क कोरोना संक्रमित

नेवा: अनलाइन न्युज – ललेन्द्र शाक्य | २०७८ पौष २३, शुक्रबार १२:०३:११

नेकपा माओवादी केन्द्रया केन्द्रीय ज्याकुथिया निम्ह बाहेक फुक्कसित कोरोना भाइरस संक्रमण जूगु दु । मुख्य सचिव श्रीराम ढकाल व शिव खकुरेल बाहेक केन्द्रीय ज्याकुथिया फुक्कसित कोरोना संक्रमण जूगु खः ।

ज्याकुथिया सचिव डोरप्रसाद उपाध्याय, एविन्द्र पराजुलीलिसेंयापिन्त कोरोना भाइरस संक्रमण जुइधुंकाः नायः पुष्पकमल दाहाल प्रचण्डं बिहिवाःनिसें नापलायेगु ज्या बन्द याःगु दु ।

ज्याकुथिया फुक्क कर्मचारीपिन्त कोरोना जुइधुंकाः प्रचण्डं नापलायेगु ज्या बन्द यानाः संक्रमित फुक्क आइसोलेसनय् च्वंगु दु । प्रचण्डं बिहिवाःनिसें हे नापलायेगु ज्इा बन्द याःगु जानकारी बिसें प्रचण्डया सचिवालयं विज्ञप्ति सार्वजनिक याःगु दु ।

आदरणीय कमरेडपिं व शुभेच्छुक पासापिं,

पार्टीया ऐतिहासिक च्याक्वःगु राष्ट्रिय महाधिवेशन सुथांलाक्क क्वचाःगु व नायः कमरेड प्रचण्ड हाकनं नायः पदय् निर्वाचित जुयादीगुलिं सकल राजनीतिक शक्ति, स्वदेश व विदेशय् च्वनाच्वंपिं नेपाःमि तताकेहेँ व दाजुकिजापिं, सकल पार्टी पंक्ति व शुभेच्छुपिंपाखें ब्यूगु बधाई व भिंतनाया नितिं दुनुगलंनिसें सभाय् देछाया च्वना ।

राजनीतिक ज्याया व्यस्तता, भीडभाड व स्वास्थ्य सतर्कताया कमीया हुनिं येँ लिसेंया थीथी थासय् अप्वःगु कोभिड संक्रमण व स्वास्थ्इकःमिपिनिगु तकं सुझाबयात ध्यानय् तसें वंगु स्वन्हु थुखेनिसें भौतिक रुपं नापलानाः हे जुयाच्वंगु बधाई व भिंतुना कालबिलयात बिहिवाःया दिंनिसें दिकागु खँया जानकारी बियाच्वना । थुकिं यानाः जूगु मछिंगु परिस्थ्तििया नितिं सचिवालयं क्षमा फ्वनाच्वना ।

जिमिसं पार्टीया नियमित प्रक्रियापाखें जुइगु संस्थागत नापलाये ज्यायात पार्टी केन्द्रीय ज्याकुथि पेरिसडाँडापाखें व्यवस्थित यायेगु कुतः यायेगु जुइ । गुलिखे सम्बाद, नापलाये ज्या, मुँज्या व सहलहयात प्रविधिया छ्यलाबुलापाखें सहजीकरण यायेगु जुइ । केन्द्रीय ज्याकुथिया गुलिखे जिम्मेवार कमरेडपिन्त तकं कोभिड संक्रमण पुष्टि जूगुलिं ज्याकुथिइ जुइगु भीडभाडय् नं उच्च स्वास्थ्य सतर्कता छ्यलेत सकलसित दुनुगलंनिसें इनाप यानाच्वना । – स्वकीय सचिवालय

Categorized in राजनीति