nepal investment baink

मांभाय्या बिकल्प मेगु भाषा जुइफइमखु ः विमल ताम्राकार

नेपालभाषा ख्यलय् आःतक दकलय् अप्वः सफू पिथंगु छगू संस्था खः कुतः पिकाक । थुगु संस्थापाखें नं नेपालभाषा एकेदेमीया सफू ब्वज्याय् स्टल तयेत झायादीगु द्ु । वय्कःलिसे सफू ब्वज्या व कुतः पिकाक सम्बन्धय् यानागु बहःचा हाकःगु खँल्हाबल्हा न्ह्यब्वयाच्वना ः
सफू ब्वज्या गथे तायाच्वन ?
गुलि सहभागिता दयेमाःगु खः उलि खनेमदु । थुकिया हुनिं छगू प्रचार मगाःगु नं जुइफु । अथेसां नं ब्वति कयादीपिं अप्वःसिनं धयाथें सफू स्वयेगु जक मखु सफू न्याना हे यंकेगु यानाच्वंगु दु । थ्व चाहिँ लसताया खँ हे खः ।


सफू ब्वज्या खलःयात लिपा लिपा थुज्वःगु ज्याझ्वः यायेत छुं सुझाव बियादी कि ?
थुकियात दँय्दसं छगू नखः कथं हनावनेमाःगु खनेदु । अले थुकिया प्रचार ब्यापक यायेमाःगु खनेदु ।


कुतः पिकाकः पाखे वने । कुतः पिकाकः स्वनेगु बिचाः गनं वल ?
ख्वपं उलि नेपालभाषाया सफू पिदंगु खनेमदु उकिया अभावयात पूर्ति यायेकथं दँय्दसं छगू सां नेपालभाषां सफू पिथनेगु आज्जु ज्वनाः थ्व कुतः पिकाक नीस्वनेगु ज्या जूगु खः । ने.सं. ११११ दँय् स्वसांनिसें दँय्दसं नेपालभाषां सफू पिथना वयाच्वनागु दु । आःतकया दुने सच्छि व च्यय्च्या(१८८)गू सफू पिथने धुनागु दु । आकिवं दुने निसः(२००)गू थ्यंकेगु ग्वसाःग्वयागु दु ।


२४दँ न्ह्यःनिसें मदिक्क सफू पिथनाच्वना दीगु दु । नेपालभाषाया सफू ब्वनीपिं हे मदु धइगु जनगुनासो दु । छिकपिनि २४ दँया अनुभवं छु धाः ?
ब्वमिपिन्थाय् झीसं सफू थ्यंके च्वनागु मदु । झीसं ब्वमिपिनिगु सवाःकथंया सफू पिथना वनेफत धाःसा ब्वमिपिनिगु अभाव जुइमखु ।

२५ दँ क्यनेत्यंगु दु । छिकपिनि छुं विशेष ज्याझ्वः द्ु कि ?
२५ दँ क्यनीबलय् निसःगु पिथना थ्यनीबलय् छगू बहचाधंगु ज्याझ्वः यानाः २५दँ बुदिं हनेगु ग्वसाः ग्वयातयागु दु ।


ख्वपं नेपालभाषा सफू पिथनाच्वंगु मदु धयादिल । तर थौं कुतः पिकाक नेपालभाषा ख्यलय् दकलय् अप्वः सफू पिकाइगु संस्था जूगु दु । थ्व गुकथं सम्भव जुल ?
दकलय् न्हापां माःगु ला भावना हे खः । थःगु मांभाय्या सेवा याये दुबलय् वति तःधंगु मेगु लुधन्ति(सन्तुष्टि) मेगु छुं हे मदु । नेपालभाषां सफू छगू पिथने खनकि तःधंगु हे उपलब्धी जूगु थे ताइगु । अले प्रत्येक पिथना पिथनेत माःगु आर्थिक स्रोत नं चूलानाच्वंगु हे दु । आः मेमेगु पिथना पिथना वनेत नं उकथं हे ग्वाहालि चूलाना वनीगु भलसा कयाच्वना ।

दकलय् लिपा छिगु छुं हसना
मांभाय्या बिकल्प मेगु भाषा जुइफइमखु । प्रत्येक नेवाःतय्सं अनिवार्य रुपं थःगु मांभाय् सयेकेमाः । सुं नं नेवालं थःमस्तय्त मांभासं थ्याये दइमखु । मांया दुरु मवल धकाः खिचाया द्ुरु त्वंवने मज्यू । सुभाय् ।
सुभाय् ।