2565 buddha Jayanti ADV

महेश बस्नेतयात गृहमन्त्री जुइगुपाखें रिमाल व भट्टराई पःखाः, राष्ट्रपतिया आशीर्वाद खगराजयात

नेवा: अनलाइन न्युज – ललेन्द्र शाक्य | २०७८ जेठ २७, बिहिबार १४:४६:२३

प्रधानमन्त्री केपी शर्मा ओलीं थौं बिहिवाः मन्त्रिपरिषद विस्तार याःगु दु । ७ म्ह मन्त्री व छम्ह राज्यमन्त्रीलिसें ओलीं थौं मन्त्रिपरिषद विस्तार याःगु खः ।

एमालेपाखें ७ म्ह व जसपाया महन्थ ठाकुर पक्षपाखें राजकिशोर यादवयात दुथ्याकाः मन्त्रिपरिषद विस्तार याःगु खः ।

प्रधानमन्त्री ओलीं थ्वसिबें न्ह्यः थःके ७ गू मन्त्रालय तयाः जसपायात १० गू मन्त्रालय बियाः मन्त्रिपरिषद विस्तार याःबलय् हे एमालेपाखें गृहमन्त्री जुइत आकांक्षी नेतापिनिगु दौडधुप न्ह्याःगु खः । सुरुनिसें हे गृहमन्त्रीइ महेश बस्नेत, खगराज अधिकारी व कर्णथापाया नां चर्चाय् वःगु खः । लिपांगु इलय् गृहमन्त्रीइ खगराज अधिकारीं बाजी त्याकल ।

बस्नेत, अधिकारी व थापा स्वम्हं प्रधानमन्त्री ओली लिक्क लाःपिं नेतापिं कथं कयातःगु दु । तर, चर्चा धाःसा थुगुखुसि बस्नेतया आपालं जूगु खः । प्रधानमन्त्री ओली बस्नेतप्रति सकारात्मक जूगु खः । तर, वया टिमय् दुपिं नेतापिं धाःसा महेश बस्नेतप्रति अनुदार खनेदत । खास धायेगु खःसा प्रधानमन्त्री ओलीया राजनीतिक सल्लाहकार विष्णु रिमाल व परराष्ट्र मामिला सल्लाहकार डा. राजन भट्टराई नं महेश बस्नेतयात गृहमन्त्री जुइके मबिइत तःधंगु भूमिका म्हितूगु खः ।

थ्व खँ महेश बस्नेतं नं थः लिक्क लाःपिं नेतापिं न्ह्यःने गुनासो प्वंकेगु याःगु खः । मेगु खँ, अधिकारीयात गृहमन्त्री दयेकेगु नितिं राष्ट्रपति विद्या भण्डारीं तकं भूमिका म्हितूगु सीदूगु दु । वं प्रधानमन्त्री ओलीयात अधिकारीयात हे गृहमन्त्री यायेमाःगु सुझाब ब्यूगु स्रोतया दाबी दु ।

Categorized in राजनीति