kmc bidya

महाराजगञ्ज शिक्षण अस्पतालय् वासः यानाच्वंम्ह ल्वगियाके कोरोना भाइरस

नेवा: अनलाइन न्युज – ललेन्द्र शाक्य | २०७७ जेठ १०, शनिबार १२:३९:४०

अस्पतालया डाक्टर चिकित्सकपिं नं क्वारेन्टाइनय् च्वनीगु

येँया महाराजगञ्जय् च्वंगु त्रिवि शिक्षण अस्पतालय् वासः यानाच्वंम्ह छम्ह मिसायाके कोरोना संक्रमण पुष्टि जूगु दु ।

मकवानपुरया हेटौंडा उपमहानगरपालिका ४ हुप्रचौर छेँ दुम्ह ५४ दँया मिसायाके शुक्रवाः कोरोना भाइरस कोभिड १९ या संक्रमण जूगु पुष्टि याःगु खः ।

नुगःचु ल्वय् (मुटु रोग)या उम्ह मिसायात हेटौंडा अस्पतालं छवाः न्ह्यः त्रिवि शिक्षण अस्पतालया मनमोहन कार्डियो थोरासिक भास्कुलर एण्ड ट्रान्सप्लान्ट सेन्टरय् रिफर याःगु खः ।

त्रिवि शिक्षण अस्पतालया कोभिड १९ संयोजक पर्सन डा. सन्तकुमार दासं वासः याकाच्वंम्ह उम्ह मिसायात कोरोना संक्रमण जूगु पुष्टि याःगु खः । वं उम्ह मिसायात गणेशमान भवनय् च्वंगु आइसोलेसनय् सारेयानागु जानकारी ब्यूगु दु ।

उम्ह मिसाया संक्रमण स्रोत धाःसा सीमदुनि । ३ नम्बर प्रदेशया सामाजिक विकास मन्त्रालयया डा. पुरुषोत्तम सेढाइँ नं हेटौंडाय् उम्ह मिसाया सम्पर्कय् दुपिनिगु कन्ट्याक्ट ट्रेसिङया ज्या न्ह्याकूगु धाःगु दु । येँ व हेटौंडाय् तकं उम्ह मिसालिसे सम्पर्कय् दुपिनिगु मालेगु ज्या जुयाच्वंगु दु ।

हेटौंडा अस्पतालया प्रमुख डा. प्रविण श्रेष्ठया कथं उम्ह मिसायाके स्वास प्रश्वासय् तकं समस्या खनेदूगु हुनिं येँय् रिफर याःगु खः । मिसायाके संक्रमण पुष्टि जुइधुंकाः थःपिं नं क्वारेन्टाइनय् च्वनेत्यनागु डा. श्रेष्ठं जानकारी ब्यूगु दु ।

Categorized in राष्ट्रिय