nepal investment baink

महानगर दुनेया फार्मेसीइ हे मदु आधारभूत मापदण्ड

नेवा: अनलाइन न्युज – ललेन्द्र शाक्य | ने.सं. ११४४ सिल्लागा खस्थि (२०८० फागुन १८)

येँ महानगरपालिका दुने संचालनय् दूगु वासः पसः (फार्मेसी)इ आधारभूत मापदण्ड कायम मजूगु सीदूगु दु ।

महानगर क्षेत्र दुने संचालनय् दूगु ११८ गू वासः पसः अनुगमन याःबलय् सुना नं आधारभूत मापदण्ड पालना याःगु मलूगु महानगरं जानकारी ब्यूगु दु ।

येँ महानगरपालिका स्वास्थ्य विभागं वंगु २१ असोजनिसें वासः पसः अनुगमन न्ह्याकूगु खः । आःतक वडा ल्याः १, २ व ३ या आपालं व मेमेगु वडाया थीथी थासय् अनुगमन याःगु दु ।

१४ वडा कलंकीइ संचालनय् दूगु मिसन फार्मेसीं फ्रिज चलेमयाःसे खोप भण्डारण यानातःगु लुयावयेधुंकाः स्वंगू प्याकेट (३० गू) एन्टिरेबिज भ्याक्सिन, टीटी खोप ९ थान व ३ थान इन्सुलिन जफत याःगु महानगरं जानकारी ब्यूगु दु ।

प्राणघातक ल्वय् रेबिजविरुद्ध बिइगु एन्टिरेबिज खोपय् याःगु थ्व लापरवाही गम्भीर प्रकृतिया खः ।

रविचन्द्र फार्मेसीइ रेफ्रिजेरेटरया तापक्रम मिलेमजूगु लुयावःगु दु ।

अनुगमनया अवस्था थुइकेधुंकाः महानगरया उपप्रमुख सुनिता डंगोलं धाःगु दु, ‘वासः पसःतसें, फ्रिज व खोप भण्डारण यायेगु कक्षय् आवश्यक जुइगु तापक्रम मिलेमयाःगु गम्भीर लापरवाही खः । जनस्वास्थ्यया मिखां स्वयेगु खःसा चरम गल्ती खः । थुज्वःगु थासय् सुधारया मौका बिइफइमखु।’

फार्मेसी अनुगमन कजि जुयाच्वंम्ह अस्पताल नर्सिङ निरीक्षक कल्पना श्रेष्ठया कथं वासः पसलय् छुं नं खोप मकाःसां ज्यू ।

श्रेष्ठं धाःगु दु, ‘वासः तयेगु फ्रिजय् कोल्ड चेन छुकी नं मेन्टेन जूगु मदु । वासः पसः दर्ता याःबलय् छम्हेसिगु नामय् प्रमाणपत्र दु । पसलय् मेम्ह हे व्यक्ति च्वनाच्वंगु दु । थुज्वःगु फार्मेसीइ गुकथं खोप कायेगु ?’

श्रेष्ठया कथं आपालं फार्मेसी वासः व्यवस्था विभागय् दर्ता दु, तर महानगरपालिकाय् आपालं दर्ता मदु । बिलय् वासःया म्याद फुइगु (एक्स्पायरी डेट) तिथि, ब्याच नम्बर छुं उल्लेख मदु । नार्कोटिक ड्रग मिइगु पसलय् डाक्टरया मेडिकल काउन्सिल दर्ता नम्बर मदु । थुज्वःगु वासः डबल लक जुइमाःगु, अथे मदु । थुज्वःगु समस्या वासः पसलय् खनेदूगु साझा समस्या खः । अथेहे फुक्कसिगु ब्यागलं ब्यागलं समस्या नं दु ।

अनुगमन झ्वलय् रियान्स आयुर्वेदिक फर्माय् सर्जिकल व एलोपेथिक वासः लुयावःगु दु । सुयोग आयुर्वेदिक वासः पसलय् आयुर्वेद अध्ययन यानामतःम्ह व्यक्तिं वासः मिइगु ज्या यानाच्वंगु लुयावल ।

अथेहे, रोयल गन्तव्य हेल्थ केयर प्रालि घट्टेकुरोया वासः पसलय् व्यक्तिया प्रमाणपत्र मदु । अनामनगरया रिजाल ड्रग हाउसय् वासःसिबें अप्वः कस्मेटिक सामान लुयावल । फ्रिजया सफाइ यानामतः ।

अनुगमनय् थुज्वःगु हे समस्या फुक्क धयाथें वासः पसलय् लुयावःगु दु ।

फार्मेसी अनुगमन कजिं श्रेष्ठं धाःगु दु, ‘महानगर दुनेया वसाः पसःया अवस्था खराब जूगु खनेदु । नां हे कायेमाःगु कथं छगू नं बांलाःगु पसः लुयामवः । छगू निगू धाःसा पायछि हे जू, मेगु अतिकं सुधार यायेमाःगु अवस्था खनेदु ।’

Categorized in बजाः