nepal investment baink

मस्कोय् सन् २००४ लिपाया हे तःधंगु हमला : १३३ म्ह सित

नेवा: अनलाइन न्युज | ने.सं. ११४४ चिल्लाथ्व पुन्हिं (२०८० चैत्र १२) सोमवाः

रुसया राजधानी मस्कोय् ग्वसाः ग्वःगु कन्सर्टय् हमला जुयाः १३३ म्ह मनूतसें ज्यान गुमेयाःगु दु ।

सन् २००४ लिपा रुसय् हमलाय् ज्यान गुमेयाःपिनिगु थ्व हे तःधंगु ल्याः खः । सन् २००४ स छगू स्कुलय् हमला जूबलय् थ्यंमथ्यं ३ सयम्हेस्यां ज्यान गुमेयाःगु खः ।

राजधानी मस्कोय् कन्सर्टय् मुनाच्वंगु भीडयात निशाना दयेकूपिंमध्ये प्यम्ह संदिग्ध मनूत गिरफ्तारीइ लाःगु रुसी सुरक्षा अधिकारीपिन्सं धाःगु दु ।

घटना धुंकाः राष्ट्रया नामय् सम्बोधन यासें रुसी राष्ट्रपति भ्लादिमिर पुटिनं अपराधीपिन्त मत्वःतेगु प्रतिबद्धता प्वंकूगु दु ।

सीपिंप्रतिया श्रद्धाञ्जलिइ राष्ट्रपति पुटिनं थौं सोमवाः रुसय् राष्ट्रिय शोक घोषणा याःगु दु ।

बीबीसीं पुटिनया धापू उदृत यासें धाःगु दु, “कायर अपराधीपिन्सं झी नागरिक व मचापिन्त निशाना दयेकल । इमित जिमिसं त्वःतेमखु । सुं सुनां निर्देशित जूसां नं इमिं कारवाहीया दायराय् हयेगु जुइ ।”

मुलुकयात रक्तपातपाखें सुरक्षित यायेत सुरक्षाय् विशेष ध्यान बिइगु पुटिनं धाःगु दु । थ्व हमला मुलुकयात विभक्त यायेगु कुतलय् जूसां नं थुकिं विचलित मजुइगु राष्ट्रपति पुटिनं धाःगु दु ।

Categorized in अन्तर्राष्ट्रिय