coved ad

मल्लकालीन शिलालेख तोडफोडको द्वपनय् छम्ह गिरफ्तार

नेवा: अनलाइन न्युज – ललेन्द्र शाक्य | २०७८ पौष २३, शुक्रबार १४:१६:२०

येँया हनुमानध्वाखा दरबार क्षेत्रय् च्वंगु मल्लकालीन शिलालेख तोडफोड याःगु द्वपनय् प्रहरीं छम्हेसित गिरफ्तार याःगु दु ।

बिहिवाः सनिलय् येँपाखें छम्ह मिसायात ज्वंगु महानगरीय प्रहरी वृत्त जनसेवाया डिएसपी दिलबहादुर मल्लं जानकारी ब्यूगु दु । शुक्रवाः पत्रकार सम्मेलन यानाः उम्ह मिसायात सार्वजनिक याःगु दु ।

पुस १५ गते बहनी हनुमानध्वाखाया गणेद्यःया देगः न्ह्यःने च्वंगु शिलालेख तोडफोड जूगु खः । प्रहरीं अन तयातःगु सिसिटिभी फुटेजया आधारय् अनुसन्धान यानाः उम्ह मिसायात ज्वंगु जनसेवां जानकारी ब्यूगु दु ।

प्रहरीया कथं उम्ह मिसायाके बिहिवाः बहनी हे बयान काःगु व वं शिलालेख तोडफोड यानागु स्वीकार याःगु दु । उगु शिलालेखया कुचा स्वानाः संरक्षण यायेगु तयारी जुयाच्वंगु हनुमानध्वाखा दरबार हेरचाह अड्डां जानकारी ब्यूगु दु ।

Categorized in दुर्घटना-अपराध