prabhu baink new

मल्टिस्टार हिन्दी संकिपा ...शोले...या सुरमा भोपाली मन्त

नेवा: अनलाइन न्युज – विजयरत्न | २०७७ आषाढ २५, बिहिबार १०:४९:५२

हिन्दी संकिपा ख्यलय् ऐतिहासिक सफल संकिपाया रुपं नांजाःगु शोले संकिपाय् सुरमा भोपाली जुयाः म्हितुम्ह कलाकार जगदिप म्हिगः बुधवाः बहनी भारतया ई कथं ८ः४० ता इलय् ८१ दँया उमेरय् थःगु हे छेँय् मन्त ।

सन् १९३९ मार्च २९ या दिं थ्व धरतीइ पलाः तयादीम्ह जगदिप विशेष याना कमेडी आर्टिस्टया रुपं नांजाःम्ह कलाकार खःसा वयागु वास्तविक नां शैयद ईश्तियाक अहमद जाफरी खः ।

मचांनिसें हे संकिपा ख्यलय् बालकलाकार जुया म्हितावःम्ह जगदिपया न्हापांगु संकिपा सन् १९५१ य् पिदंगु अफसाना खः । थ्व संकिपाया निर्देशक बी.आर. चोपडा खः ।

गुलिखे संकिपाय् बालकलाकार जुया म्हितुम्ह जगदिपं लिपा निर्देशक गुरु दत्तया आरपार, बिमल रायया दो बिघा जमीन निसें कया पुराना मन्दिर, अन्दाज अपना अपना लिसेलिसें प्यसलं मयाक्क संकिपाय् थीथी भूमिकाय् म्हिताः स्वकुमिपिनिगु नुगः त्याकेत ताःलाःम्ह कलाकार खः ।

जगदिपया स्वम्ह कला दुसा बलिउडया नांजाःम्ह स्टार जावेद जाफरी व नावेद जाफरी लिसेलिसें वया खुम्ह सन्तान दु ।

उमेर वनेधुंकाः संकिपा ख्यलं तापानाच्वंम्ह जगदिप छुं ई न्ह्यःनिसें छेँय् च्वनाच्वंम्ह खःसा क्यान्सर ल्वचं कया वासः याकाच्वंम्ह खः ।

जगदीपया आपालं आपाः हे सुपरहिट जूगु संकिपात दु । वय्कलं छम्ह प्रहरीया भूमिकाय् सुरमा भोपालीया नामं अभिनय यानादीगु संकिपा शोलेपाखें वय्कः अतिकं अतिकं सुरमा भोपालीया नामं चर्चाय् वःगु खः ।

Categorized in कला