Header Nepal rastra bank Adv

मलेसियाय् नं ओमिक्रोन, स्वास्थ्य सेवा सुदृढ यायेत डब्ल्यूएचओपाखें आह्वान

नेवा: अनलाइन न्युज – ललेन्द्र शाक्य | २०७८ मङ्सिर १७, शुक्रबार १४:२४:२९

दक्षिण अफ्रिकाय् न्हापांगुखुसि लुयावःगु कोरोना भाइरसया न्हूगु भेरियन्ट ओमिक्रोन ब्वलनीगु क्रम जारी जुयाच्वंगु दु ।

मलेसियाय् तकं ओमिक्रोनया छम्ह संक्रमित लुयावःगु दु । मलेसियाया स्वास्थ्यमन्त्री खयरी जमालुद्दिनं थःगु मुलुकय् ओमिक्रोनया न्हापांम्ह संक्रमण पुष्टि जूगु धाःगु दु । नोभेम्बर १९ दक्षिण अफ्रिकां सिंगापुर जुयाः मलेसिया वःम्ह विदेशी यात्रुयाके संक्रमण खनेदूगु मन्त्री जमालुद्दिनया धापू खः ।

मलेसियाया स्वास्थ्य विभागं तकं दक्षिण अफ्रिकां वःपिं २५४ म्ह यात्रुमध्ये छम्हेसिके ओमिक्रोन पुष्टि जूगु दु । उपिं यात्रुपिंमध्ये कम्ती नं ८३ म्हेसिके कोरोना नेगेटिभ खनेदूगु, १३४ म्हेसिगु परीक्षण रिपोर्ट वयेल्यंूगु व ३५ म्हेसिगु स्वाब परीक्षण यायेम्वाःगु विभागया धापू दु ।

फिलिपिन्सय् दक्षिण अफ्रिकापाखें वम्ह छम्ह व्यक्तियाके कोभिड १९ पुष्टि जूगु व छु भेरियन्ट धकाः क्वःछिइत जिन सिक्वेन्सिङ जुयाच्वंगु अलजजिरां धाःगु दु ।

थ्वहे दथुइ, विश्व स्वास्थ्य संगठन (डब्ल्यूएचओ) नं एसिया प्रशान्त क्षेत्रया मुलुकय् स्वास्थ्य सेवा सुदुढ यासें व मनूतय्त पूर्ण खोप बियाः ओमिक्रोन भेरियन्टपाखें जुइफूगुु सम्भावित संक्रमणया नितिं तयारी यायेत धाःगु दु ।

विश्व स्वास्थ्य संगठनया क्षेत्रयि निर्देशक टाकेशी कासाई नं धाःगु दु, ‘सीमा बन्द यायेबलय् छुं ई संक्रमण पनेफइ तर सम्भावित न्हूगु संक्रमणया नितिं फुक्क मुलुक व समुदायं तयारी यायेमाः ।’
यात्राया कडाइलय् जक भर जुइमज्यूगु व सम्भावित संक्रमण पनेगु नितिं खोप कायेगु लिसेंया मेमेगु उपाय तकं छ्यलेमाःगु वया धापू दु ।

Categorized in अन्तर्राष्ट्रिय