नेवा: अनलाइन न्युज – ललेन्द्र शाक्य | २०७९ फाल्गुण १६, मंगलबार १५:२१:३२

आईसीसी यू–१९ विश्वकप एसिया क्षेत्र छनोटया प्यंगूगु कासाय् नेपालं मलेसियायात १० विकेटं बुकूगु दु । मलेसियां ब्यूगु ७३ रनया लक्ष्य नेपालं विना क्षति पावर प्ले नं क्वमचावं पूवंकूगु खः ।

९ ओभरय् ७३ रनया आज्जु पूवंकेगु झ्वलय् नेपाःया नितिं ओपनर ब्याटर दिपक बोहरां २९ बलय् ८ चौका प्रहार यासें ३८ रन दयेकूगुु खः । अथेहे, मेम्ह ओपनर अर्जुन कुमालं २५ बलय् ३ चौका लिसें २१ रन मुंकूगु खः ।

मलेसियाया पाखें १४ रन एक्स्ट्रा उपहार जुल ।

थ्वसिबें न्ह्यः मलेक क्रिकेट मैदान, अज्मानय् टस त्याकाः ब्याटिङ याःम्ह मलेसिया ३५.३ ओभरय् ७२ रन दयेकूसें अलआउट जूगु खः । मलेसियाया नितिं मोहम्मद अक्ररम मलिकं सर्वाधिक २६ रन दयेकूगु खः ।

ओपनर हैरिल हरिसनं १२ रन मुंकूगु खः । न्हापांम्ह ओपनर कप्तान सिद्धार्थ कार्तिक राजारत्नम ओपनिङ ओभरया स्वंगूगु बलय् आकाश चन्दया ल्हातं बोल्ड जुल । निगूगु विकेटया नितिं हरिसन व मलिकं २८ रनया साझेदारी यात । थ्वहे मलेसियाया नितिं बल्लाःगु साझेदारी जुल ।

खुम्हम्ह ब्याटर मोहम्मद स्याहिर स्यामिलं १२ रन दयेकल । मेपिं सुं नं ब्याटर दोहोरो ल्याः मुंकेत क्रिजय् च्वनेमफुत ।

नेपाःया नितिं स्पिनर दिपेश कँडेलं १० ओभर बलिङ यासें ४ मेडन लिसें ११ रन खर्चेयानाः सर्वाधिक ४ विकेट काल । आकाश चन्दं ४.३ ओभर बलिङ यासें ९ रन खर्चेयानाः ३ विकेट काल ।

मिलन बोहरां ९ ओभर बलिङ यासें ५ मेडन लिसें ८ रन खर्चेयानाः २ विकेट काल । स्पिनर सुवार भण्डारीं १ विकेट काल ।

नेपाःया नितिं थ्व मदिक्क प्यंगूगु जित खः । आः नेपालं न्यागूगु व लिपांगु कासा आःतकया हे बल्लाःम्ह प्रतिस्पर्धी कथं कयातःगु यूएईलिसे बिहिवाः म्हिती ।

Categorized in कासा