ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

मर्स्याङ्दीइ खुसिबाः, चामेया झोलुंगे तां चुइकल, वयेवनेगुलि समस्या

नेवा: अनलाइन न्युज – ललेन्द्र शाक्य | २०७८ श्रावण ६, बुधबार १७:३६:००

मंगलवाः सनिलनिसें वःगु तच्वःगु वाया हुनिं मर्स्याङ्दी खुसिइ वःगु खुसिबालं सदरमुकाम चामेया झोलुंगे तां चुइकूगु दु ।

जिल्लाया माथिल्लो मनाङ स्वाःगु छगू जक झोलुंगे तां चुइकेधुंकाः चामे व मनाङया भक्तपुर व माथिल्लो मनाङलिसेया वयेवनेगुलि समस्या वःगु दु ।

वंगु जेठ लिपांगु इलय् वःगु वां यानाः मर्स्याङ्दी खुसिइ वःगु खुसिबाः व चलखं सतक संजाल चुइकाः विच्छेद जूगु खः । मंगलवाः सनिलनिसें वःगु तच्वःगु वाया हुनिं आः चामेया झोलुंगे तां नं चुइकाः यनेधुंकाः वयेवनेगुलि झन समस्या ब्वलंगु खः ।

माथिल्लो मनाङ स्वाःगु उगु तां बुधवाः सुथय् वःगु खुसिबालं चुइकूगु प्रमुख जिल्ला अधिकारी विष्णुु लामिछानें जानकारी ब्यूगु दु । 

लामिछानें धाःगु दु, ‘सतक संजाल विच्छेद जूसां नं झोलुंगे तां नं सहज यानाच्वंगुलि व नं चुइकेधुंकाः आः तसकं समस्या ब्वलंगु दु । मेमेथाय् छुं छुं थासय् दयेकातःगु सिँया गोरेटो लँपु तकं मर्स्याङ्दी खुसिइ वःगु खुसिबालं चुइकाः यंकूगु दु । बर्षात् म्हो जुयाः सहज जुइ कि धैगु आश दुसां नं हाकनं वा वयाः समस्या जटिल जुजुं वनाच्वंगु दु ।’

खुसिबाः व चलखं लिच्वः लाःपिन्त खाद्यान्नलिसें अत्यावश्यक हलंज्वलं थ्यंकेत सहज जूगु थासय् नं समस्या थप जूगु चामे गाउँपालिकाया नायः लोकेन्द्रबहादुर घलें धाःगु दु । वं धाःगु दु, ‘थुगुखुसि प्राकृतिक विपत्तिं नं मनाङयात आपालं कष्ट ब्यूगु दु, आः बुलुहुँ म्हो जुइ धाल, हाकनं समस्या वइ, अथेला सतक संजाल सहज मजूबलय् खाद्यान्न अभाव जुइगु अवस्था दु ।’

चामेया माटरेवल तांमय् धाःसा आःतक समस्या जूगु मदुनि । तांमय् खुसिबालं हःगु फि, ल्वहँ व सिं लः वनीगु लँपु पंगुलिं बस्तीपाखे वनाः अनच्वंगु स्कूलय् क्षति जूगु दु । थ्वसिबें न्ह्यः हे वःगु खुसिबाः व चलखं मनाङया सरकारी, गैरसरकारी व व्यक्तिगत भौतिक संरचनाय् आपालं क्षति जुइधुंकूगु दु ।

 

Categorized in दुर्घटना-अपराध