dudha jayanti 2568

मरुसतः राष्ट्रिय म्हसीका राष्ट्रिय सम्पदा

– वीरेन्द्रभक्त श्रेष्ठ
नेपाःमिपिं भुखाचं आहत जूसां नं परास्त जुयागु मदुनि धइगु खँ क्यनेत झी मुनागु दु । भुखाय्लिपा खोज तथा उद्धार व ग्वाहालिया छगू चरण क्वचाःगु दु । आः पुनःनिर्माण न्ह्याके माःगु दु । सरकारं थःगु हे कथं तयारी न्ह्याकाच्वंगु दु । तर झी नागरिक नं सुम्क च्वनेगु ई मखु, च्वने मज्यू । सरकारया ध्यान प्यखेरं वनाच्वंगु दइ, नागरिक पुचः निश्चित विषयलय् केन्द्रीत जुइफइगुलिं राष्ट्रिय सम्पदा पुनःनिर्माण यायेत सरकार व जनताया ध्यानाकर्षण यायेफइ ।

काष्ठमण्डप – राष्ट्रिय पहिचान
थुगुसीया भुखाचं काष्ठमण्डप स्मारकलिसें थुगु लागाया यक्व पुरातात्विक, सांस्कृतिक महत्वया सम्पदाया क्षति जूगु दु । काष्ठमण्डप स्मारक येँया म्हसीका खः । थ्व अर्थय् थ्व देय्या हे महत्वपूर्ण स्मारक खः । राष्ट्रिय पहिचानया स्मारककथं काष्ठमण्डप पुनः निर्माण जुइमाः ।

नेवाः सभ्यता – राष्ट्रिय सम्पदा
मरुसतः थुगु लागाया दकलय् पुलांगु स्मारक खः । तर थ्व मरु सतः सामान्य भवन जक मखु । हिन्दू व बौद्ध परम्पराया अपूर्व मिलन व अपार सहिष्णुता नेवाः सभ्यताया विशेषता खः । थ्वहे विशेषतां नेपाःयात धार्मिक व सांस्कृतिक सहिष्णुताया आदर्श भूमि दयेकूगु दु । थन दुगु कलात्मक व सांस्कृतिक विविधताया यथावत् संरक्षण यायेत तत्काल ध्यान बीमाः ।

नेवाः पौरख – राष्ट्रिय गौरव
मरुसतःया वास्तुकला नेवाः शिल्पीतय्गु पौरख खः । थुकिं नेपाःया वास्तुकलायात विश्वस्तरय् थनाब्यूगु दु । थुकिं थ्व राष्ट्रिय गौरवया विषय खः । मरुसतःया पुनःनिर्माण सामान्य स्मारकया निर्माण जक मखसें नेवाः शिल्प व राष्ट्रिय गौरवया म्हसीका बीगु स्मारक खः । थथेजूगुलिं मरुसतः लागाया पुनःनिर्माणं महत्व व प्राथमिकता काये खनेमाः ।

प्रतिस्पर्धा मखु, पूरक भूमिका
जिपिं सरकार वा मेगु गुगुं निकायलिसे प्रतिस्पर्धा यायेत न्ह्यचिलागु मखु । जिमिसं ला राज्ययात वयागु कर्तव्य पूरा यायेत झकझकय् यायेत स्वयागु जक खः । मरुसतःया महत्वकथं पुनःनिर्माणय् प्राथमिकता बिइमा धइगु झीगु इनाप खः । थुकियालिसें मरुसतः स्मारक व नगर निगुलिं पुनःनिर्माणय् प्राचीन कलाया संरक्षणय् ध्यान बिइमा धकाः नं जिपिं संगठित जुयागु खः ।

सहभागिता व प्रतिबद्धता
जिपिं पुनः निर्माण अभियानय् माःकथं सहभागी जुइत व गच्छेकथं योगदान यायेत नं तत्पर दु धइगु सन्देश बीत नं संगठित जुयागु खः । मरुसतः पुनःनिर्माणय् नेपाली जनता विशेष यानाः जिपिं येँयापिं सहभागी जुइत तत्पर दु । लिसें, सरकारं थुकिया महत्ताकथंया महत्व व प्राथमिकता मबिल धाःसा जिपिं पुनःनिर्माण अभियान सञ्चालन यायेत नं तत्पर दु धइगु सन्देश बीगु नं जिमिगु उद्देश्य खः ।
(थुगु बिचाःया च्वमि मरुसतः पुनःनिर्माण अभियानया कजि खः)