1142 nhoo dan adv

मरी पसलय् म्याद फुइधुंकूगु रंगया छ्यलाबुला, २ लख जरिवाना

नेवा: अनलाइन न्युज – ललेन्द्र शाक्य | २०७८ कार्तिक १२, शुक्रबार १५:०७:४८

येँ महानगरपािलकां स्वन्तियात लक्षित यासें मरी पसःया अनुगमनयात तीव्रता ब्यूगु दु । येँ महानगरपालिकाया बजार व्यवस्थापन व उपभोक्ता हित संरक्षण समितिं याःगु अनुगमनया झ्वलय् गुलाब मिठाइ पसल लुँहिति (सुन्धारा)यात २ लख तका दां जरिवाना तकं पुइकूगु दु ।

स्वयेबलय् आकर्षक खनेदूगु मिठाइ दयेकेत कच्चा पदार्थया गुणस्तर लापरवाही जूगु सीदुगु खः । सालिमार हस्पिटालिटी एण्ड फुड प्रा.लि.या नामय् दर्ता जुयाः सहरया थीथी थासय् गुलाब ब्राण्डया मिठाइ उत्पादन व मिइगु ज्या यानाः वयाच्वंगु दु ।

शुक्रवाः येँ महानगरया बजार व्यवस्थापन व उपभोक्ता हित संरक्षण समितिं याःगु अनुगमनया झ्वलय् पसःया भान्छाय् म्याद फुइधुंकूगु रंग, मेमेगु कम्पनीं उत्पादन यानातःगु खाद्यवसतुइ लेवल व उत्पादन याःगु खाद्यवस्तुइ भारतीय कम्पनीया लेवल तःगु, उत्पादन मिति तयामःगु पेय पदार्थ मिइगु यानाच्वंगु सीदूगु खः ।

थ्वसिबें न्ह्यः अनुगमन पुचलं न्यूरोडय् च्वंगु पसःया नं निरीक्षण याःगु खः । निरीक्षणया झ्वलय् उत्पादन मिति तयामतःगु बजिया बोरात लुयावःगु खः ।

अनुचित व्यापारिक क्रियाकलाप याःपिं व्यापारीपिन्त जरिवाना तकं पुइकूगु दु । निरीक्षण अधिकृत हरिबहादुर भण्डारीं मिठाइ पसः संचालकपिन्सं निर्देशनया अवज्ञा याःगु सीदूगु धाःगु दु । वं धाःगु दु, ‘थ्वसिबें न्ह्यः बियागु निर्देशनया पालना याकेगु वा उकिया नितिं तत्परता खनेमदयेधुंकाः जरिवाना पुइकाःगु खः ।’

गुलाबया न्हापांगु तलाय् मिठाइ दयेकेगु ज्या यानाच्वंपिं ज्याकःमिपिं खाली ल्हाःतं लड्ड् दयेकाच्वंगु खः । लिक्क तःग्वःगु खुल्ला थलय् लालमोहन व रसबरी तयातःगु लुयावःगु खः ।

स्वंगूगु तल्लाय् तयातःगु सामानत स्वयेबलय् दुगड कम्पनीपाखें उत्पादन जूगु १ किलोग्रामया १० गू म्याद फुइधुंकूगु बेसनया प्याकेट लुयावःगु खः ।

मेगु तल्लाय् भण्डारया लिक्क खिउँगु कुनाय् बच्छि बोराय् की दाःगु २६ किलो बेसन दूगु दु । थथे लुयावःगु सामान नष्ट यासें अनुगमन पुचलं सुधार यायेमाःगु सल्लाह ब्यूगु खः ।

गुलाबय् लुयावःगु हलंज्वलं खाद्य सुरक्षाया कोणं गम्भीर लिच्वः लाकेफूगु कथंया खः । अनुगमनय् दुपिं खाद्य प्रविधिव गुण नियन्त्रण विभागया खाद्य निरीक्षक कौशल ओझा नं धाःगु दु, ‘गुगु मरी पसलय् वन अन वहे समस्या दु ।’

Categorized in बजाः