Mohanai 2078 KTM

मन्त्री गजेन्द्रबहादुर हमालं राजीनामा बिल

नेवा: अनलाइन न्युज – ललेन्द्र शाक्य | २०७८ आश्विन २४, आइतबार ११:०९:०१

उद्योग वाणिज्य व आपूर्तिमन्त्री गजेन्द्रबहादुर हमालं प्रधानमन्त्री शेरबहादुर देउवा न्ह्यःने राजीनामा लःल्हाःगु दु ।

आइतवाः सुथय् बालुवाटार थ्यंकाः हमालं प्रधानमन्त्री देउवायात राजीनामा लःल्हाःगु खः । हमालं राजीनामा ब्यूगु प्रधानमन्त्रीया सचिवालयं पुष्टि याःगु दु ।

हमाल शुक्रवाः मन्त्री नियुक्त जूगु खः । प्रधानन्यायाधीश चोलेन्द्र शमशेर जबराया ‘कोटा’पाखें हमालयात देउवां मन्त्री दयेकूगु धासें प्यख्येंरं आलोचना जुयाच्वंगु खः ।

मन्त्री पदं थःगु नियुक्तियात कयाः सकल थासं न्ह्यसः ब्वलनेधुंकाः नैतिकताया ल्याखं नं पदय् च्वने पायछि मजूगु निष्कर्षय् थ्यंकाः राजीनामा बियागु मन्त्री हमालं धाःगु दु ।

प्रधानमन्त्री लिक्क लाःगु स्रोतया कथं राजनीनामा लःल्हासें हमालं धाःगु दु, ‘संविधान व कानूनी राज्यया पक्षय् तःहाकःगु लडाइँ ल्वाना वयाम्ह व्यक्ति जूगुलिं आः संविधानयात हे सार्वजनिक रुपं न्ह्यसः ब्वलंबलय् पदय् च्वनाच्वने पायछि मजूगु तायेका ।’

Categorized in राजनीति