dudha jayanti 2568

मनोहरा लागाया अतिक्रमित संरचनाय् डोजर

नेवा: अनलाइन न्युज – ललेन्द्र शाक्य | २०८० जेठ ९, मंगलबार १५:०५:३०

मध्यपुर थिमिया मनोहरा तां (पुल) लागाय् अतिक्रमण यानाः दयेकातःगु संरचनाय् येँ महानगरपालिका अन्तर्गतया मनोहरा जग्गा एकीकरण आयोजनां डोजर चलेयाःगु दु । आयोजनातं दच्छि न्ह्यःनिसें टहरा चिइकेत्यंसां नं थौं जक चिइकेफूगु आयोजनाया उपनिर्देशक निर्मलराज बरालं जानकारी ब्यूगु दु ।

आयोजनां २०७९ भाद्र ५ व १७ फागुनय् गोरखापत्रय् सुचं पिकयाः टहरा चिइकेत निर्देशन ब्यूगु खः । उगु सुचंलिपा टहराय् च्वनाच्वंपिं मनूतसें उच्च अदालतय् रिट निवेदन ब्यूगु खः तर उच्च अदालतं २०८० जेठ ४ गते अन्तरिम आदेश मबिल ।

अदालतं रिट खारेज यायेधुंकाः आयोजनां माइकिङ यासें टहरा चिइकेत निर्देशन ब्यूसां नं अटेर याःगुलिं थौं मंगलवाः डोजर चलेयायेमाःगु उपनिर्देशक बरालं जानकारी ब्यूगु दु ।

बरालं धाःगु दु, ‘सुनां आयोजना अन्तर्गतया जग्गा हड्पेयानाः च्वनाच्वंगु दु, वयात जिमिसं साविकय् गन उम्ह व्यक्तिया जग्गा दूगु खः, अनहे जग्गा बियागु खः तर इमिसं आयोजना अन्तर्गत दूगु जग्गाय् हे दाबी यायेधुंकाः डोजर छ्यलाः चिइकाःगु खः ।’

बरालया कथं टहरा धनीया जग्गा आयोजनानापं स्वानाच्वंगु जूसां नं आयोजनाय् हे टहरा धनीं दाबी यानाच्वंगु दु ।

आयोजनां बुधवाः येँ महानगरपालिका क्षेत्रपाखे आयोजनाया जग्गा अतिक्रमण चिइकेत माइकिङ याइगु जूगु दु ।

बरालं धाःगु दु, ‘थौं मंगलवाः मध्यपुर थिमिपाखे जुल, येँ क्षेत्रय् नं अतिक्रमित संरचना चिइकेमाःगु दु, कन्हय् बुधवाः माइकिङ यायेगु जुइ, टेरेमयात धाःसा डोजर छ्यलेमालीगु जुइ ।’

महानगरपालिकां येँया माइतीघर क्षेत्रय् डोजर चलेयायेगु तयारी याःगु दु ।

Categorized in स्थानिय-समाज