Mohanai 2078 KTM

मनोज नेवाःखड्गीया नेतृत्वय् नेवाः जातीय महासंघ निस्वन

नेवा: अनलाइन न्युज | २०७८ आश्विन २६, मंगलबार २२:४८:४२

नेवाः समुदाय दुनेया थीथी जातिय संगठनतय् मंकाः संगठन कथं नेवाः जातिय महासंघ शनिबाः निस्वगु दु । नेवाः समुदाय दुनेया थीथी १८ जातीय संगठनया मुनां शनिबाः महासंघया तदर्थ कार्य समिति निंस्वगु खः । यात । १८ जातिय संगठनलिसें संचारकर्मी, नेवाः अभियानकर्मीतकंया उपस्थितीइ नीस्वंगु  दुजःया तदर्थ समितिइ खड्गी सेवा समितिया मनोज नेवाः खड्गीयात नायः ल्यःगु दुसा स्यस्यः समाजया दानदास श्रेष्ठयात न्वकू ल्यःगु दु । अथे हे, राजोपाध्याय समाजया बिराजकाजी राजोपाध्याययात मू छ्यान्जेया भाला ब्यूगु दु । रजक समाजया किरण मघैया छ्यान्जे पदय् च्वनादीगु दु । दांभरिं पदय् पुतुवार नगरकोटी राजवाहक (पुनरा) विकास समाजया सागर पुतुवारयात तःगु दु । प्यम्ह दुजलय् नेपाल तण्डुकार समाजया सुरेश तण्डुकार, बलामी समाजया बेखराम वलामी, कपाली समाजया श्यामकृष्ण दर्शनधारी व नेपाल माली समाजया अमर मालीयात तःगु दु । 

तदर्थ समिति गठन धुंकाः समितिया सकल पदाधिकारी व दुजःपिन्त नेवाः देय् दबूया पूर्व छ्यान्जेलिसें नेवाः संस्कृति सम्वन्धि अध्येता जितेन्द्र विलास बज्राचार्यं खादा क्वखायेकादिल । महासंघया तदर्थ कार्य समितिया नायः ल्ययेधुंकाः नवासें मनोज नेवालं नेवाः समाजया शक्ति जुयाच्वंगु जातिय संगठनतय्त नेतृत्व वर्गं कार्यकर्ताया रुपय् जक प्रयोग यानावःगुलिइ आः सकसिगु शक्ति छथाय् मुंकाः थप उर्जाशील जुयाः न्ह्याःवनेगु धयादिल । ‘हरेक नेवाः समाजया गतिविधि, आन्दोलनया शक्ति धयागु जातिय समाज खः, आः थ्व शक्ति दक्वं छथाय् मुनाः थःगु हक अधिकारया प्राप्तिया नितिं झन बल्लाक, धिसिलाक्क झी न्ह्याःवनेगु जुइ’ नेवालं धयादिल । आः १८ जातिय समाज दुथ्याःगुलिइ आवश्यकता कथं मेगु जातीय समाज नं तनावनेगु व आवश्यक प्रकृयाय् न्ह्याःवनेगु वयकलं धयादिल । महासंघं वइगु कार्तिक ६ गते स्वन्ति व नेपाल संवत न्हूदँ ११४२ या लसताय् भिंतुना कालबिल ज्याझ्वः यायेत्यंगु दु ।

Categorized in नेवाः