1142 nhoo dan adv

मनूया ल्हातं अकालय् सीमाःपिं कीतय् लुमन्तिइ स्मारक

२०७२ जेठ २७, बुधबार ०९:३८:३१

जापानया छगः देगलय् छगू बिस्कं कथंया स्मारक दयेकूगु दु । थ्व स्मारक कीतय् लुमन्तिइ दयेकूगु खः गुपिं मनूया ल्हातं अकालय् सीमाल ।

थुगु स्मारकय् ल्वहँतय् गयाच्वंम्ह झिंगुर थेंजाःम्ह तःधिकःम्ह कीया मूर्ति दयेकूगु दु गुकियात तारया पंजलं घेरे यानातःगु दु ।

जापानया क्योडो न्युज एजेन्सीया कथं उगु स्मारकया ल्यूने एनाटोमिस्ट ताकेशी योरोया परिकल्पना दु । योरो कीतयत अतिकं मतिना याइम्ह खः । योरोया कथं थुगु स्मारकं कीतय् आत्मायात शान्ति बी । थुकिं पर्यावरणप्रति जागरुकता नं थनाबी ।

दक्षिणी टोकियोया केन्चोजी देगलय् वंगु बिहीवाः थुगु स्मारकया उलेज्या याःगु खः । उगु ज्याझ्वलय् योरोया लिसें ५० म्हेसिनं ब्वति काःगु खःसा बौद्ध भिक्षुपिंसं अन बौद्ध सूत्र नं पाठ याःगु खः ।

अमेरिकाय् नं दु कीया स्मारक

थुज्वःगु हे कीतय् स्मारक अमेरिकाया अल्बामा प्रान्तया इन्टरप्राइजेज सहरय् नं दु । उगु स्मारक नं छम्ह कीया लुमन्तिइ दयेकातःगु खः । सन् १९१९ स दयेकूगु थुगु स्मारकय् छम्ह मिसां झिंगुर प्रजातियाम्ह कीयात ल्हातं ल्ह्वनातःगु दु । न्हापा थुज्वःगु कीतय् प्रकोपं उगु थासय् जुइगु कपायया खेती बर्बाद यानाबिल । अनं लिपा मेगु खेती यानाः थनया बस्ती समृद्ध जूगुलिं थुम्ह कीयात लुमन्तिइ स्मारक दयेकूगु खः धाइ ।