नयाँ शक्ति नेपाल पार्टीया घोषणा येँया त्रिपुरेश्वरय् च्वंगु दशरथ रंगशालाय् डा. बाबुराम भट्टराई नं यानादीगु दु । ज्याझ्वलय् नेकपा माआवादी केन्द्रया नायः प्रचण्ड उपस्थित जुयामदीसा नेपाली कांग्रेसया सभापति शेरबहादुर देउवा, राप्रपाया सुनिलबहादुर थापालिसें देस बिदेशया कूटनीज्ञपिं उपस्थित जुयादीगु खः ।

ज्याझ्वलय् न्हापां थीथी ब्यानर, भेषभूषा न्ह्यब्वःगु खः । मेमेगु पार्टीया ब्वज्यासिबें ब्यागलं कथं दबुली सुं नं वक्तापिं यथावत रुपं मच्वंसे पालंपाः दबुली वनाः न्वःवाःगु खः ।
डा. बाबुराम भट्टराई नं पार्टीया घोषणा यायेखतं पार्टीया नां दूगु टुललिसेंया बेलुन सर्गतय् ब्वयेकूगु खः ।

घोषणा याये न्ह्यः ज्ञात अज्ञात सहिदपिनिगु लुमन्तिइ १ मिनेट मौनधारण याःगु खःसा राष्ट्रिय गान बैण्ड बाजालिसें न्ह्यब्वःगु खः ।

पार्टी घोषणाया लिसें डा. बाबुराम भट्टराईं पार्टीया सकल दुजःपिन्त सपथ ग्रहण याकूगु खः । ज्याझ्वलय् थीथी सांस्कृतिक ब्वज्या नं जूगु खः ।
ज्याझ्वलय् ब्वति कयाः जुलुसय् सहभागी मनूतय्गु रंगशाला दुने तयां तयेथाय् मदूगु खः ।

डा. सुन्दरमणि दीक्षितं नागरिक समाजपाखें डा. बाबुराम भट्टराईया नेतृत्वय् नयाँ शक्ति नेपाल पार्टीपाखें छुं आस खनागु खँ न्ह्यथनादीगु खः । अथेहे प्रदीप गिरीं नं थःगु नुगःखँ तयादीगु खः ।

ज्याझ्वःया प्रत्यक्ष प्रसारण थीथी टेलिभिजन मिडियां याःगु खः ।    

किपाः नेवाः अनलाइनन्युज