zero media family planning adv

मनूतय्त वाइफाइया नशा !

२०७३ मङ्सिर ७, मंगलबार १०:०२:०९

आः वाइफाइ दकले महत्वपूर्ण न्हिथंया आवश्यकता जूगु दु । छगू अध्ययन कथं ४० प्रतिशत मनूत सेक्स, चकलेट व अय्लाःथें जाःगु मानवीय आवश्यकता व नसाज्वलंसिबें वाइफाइयात अप्वः महत्व ब्यूगु सीदूगु दु ।

वाइफाइ कनेक्टिभिटी सेवा प्रदायक आइपासं युरोप व अमेरकाया १७,०० म्ह मनूत व्यवसायिक मनूतय्गु दथुइ याःगु अध्ययनं थुज्वःगु क्यंगु खः । उगु झ्वलय् उपिं मनूतय्त मानवीय आवश्यकता व विलासीताया वस्तु व वाइफाइयात इमिसं बिइगु महत्व गुलि दु धकाः सीइकेगु याःगु खः । वहे झ्वलय् सहभागीपिन्सं दकले अप्वः महत्वपूर्ण चिजयात १ ल्याः ब्यूगु खःसा दकले कम महत्वपूर्ण चिजयात ४ ल्याः ब्यूगु खः ।

लिच्वः कथं ४०.२ प्रतिशत अर्थात् दकले अप्वः मनूतसें वाइफाइयात दकले अप्वः महत्वपूर्ण चिजया रुपं स्वीकार याःगु दु । वाइफाइया न्ह्यःने सेक्स नं महत्वहीन जूगु दु व केवल ३६.६ प्रतिशतं जक सेक्सयात दकले अप्वः महत्वपूर्ण कथं काःगु दु । १४.३ प्रतिशतं चकलेटयात व ८.९ प्रतिशतं अय्लाःयात दकले अप्वः चिजया रुपं काःगु दु ।

आइपासया मू व्यवसाय अधिकृत प्याट ह्युमं धाःगु दु, “वाइफाइ केवल इन्टरनेट कनेक्टिभिटीया दकले अप्वः लोकप्रिय माध्यम जक जूगु मदु मेमेपिं आपालं मानवीय आवश्यकता व लक्जरीयात नं लिपा लाकूगु दु ।”

छुं दँ न्ह्यःतक मनूतसें सेक्स, चकलेट व अय्लाःयातसिबें वाइफाइयात अप्वः महत्व ब्यूगु दु धैगु खँ कल्पना पिनेया खँ जुल । तर आः मास्लोया आवश्यकता पदसोपानय् इन्टरनेट दकले अप्वः आधारभूत तहलय् लाःगु दु ।
वाइफाइ नं थुलि अप्वः महत्व काःगुया हुनिं चाहिँ थुकिं झीगु न्हिथं जीवनय् लिच्वः लाकूगु हे खः ।

उल्लेखित अध्ययनय् सहभागी याकूपिंमध्ये स्वंगू चौथाई नं वाइफाइपाखें थःगु जीवनय् सकारात्मक प्रभाव लाकूगु धाःगु दु ।

अध्ययन कथं आः आपालं मनूत चाःहिलेगु योजना दयेकूसां तकं होटलय् वाइफाइ कनेक्सन जूमजूगु धैगु आधारय् च्वनेगु प्रबन्ध याइगु जूगु दु ।