nepal investment baink

मध्य व पश्चिम तराईस ३२ जेठतक क्वाःगु फय् वइगु

नेवा: अनलाइन न्युज – ललेन्द्र शाक्य | नेपाल संवत ११४४ तछलाथ्व पंचमी (२०८१ जेष्ठ २९ गते) मंगलवाः

नेपाःया पूर्वी सिमाना कोशी प्रदेशय् मनसुन दुहाँ वयेधुंकूसां नं मध्य व पश्चिमी तराईया भूभागय् धाःसा अतिकं तांन्वयाच्वंगु दु ।

अझ नं स्वन्हुतक मध्य व पश्चिमी तराईया भूभागय् क्वाःगु फय्या लहर न्ह्याइगु सम्भावना दु । उकिं जल व मौसम विज्ञान विभागया मौसम पूर्वानुमान महाशाखां थौं मंगलवाः विशेष बुलेटिन सार्वजनिक यासें सतर्कता छ्यलेत धाःगु दु ।

महाशाखां थौं मंगलवाः सुथय् ११ ता इलय् सार्वजनिक याःगु विशेष बुलेटिनय् धयातःकथं जेठ २९, ३० व ३१ गतेतक क्वाःगु फय् व क्वाःगु लहरया सम्भावना दूगु न्ह्यथनातःगु दु ।

महाशाखाया कथं मधेश व बागमती प्रदेशया तुलनाय् सुदूरपश्चिम व लुम्बिनी प्रदेशया तराई भूभागय् अप्वः गर्मी जूगु दु ।

उगु थासय् विगत छुं दिं न्ह्यःनिसें अधिकतम तापक्रम ४० डिग्री सेल्सियस वा वसिबें अप्वः नं मापन याःगु दु ।

कोशी प्रदेशय् धाःसा मनसुनी प्रणाली दुहाँ वयेधुंकूगु दु । थुगु दँ सरदर तिथि जुन १३ सिबें स्वन्हु न्ह्यः हे मनसुन नेपालय् दुहाँ वःगु खः ।

इलय् ब्यलय् वा वयाच्वंगुलिं कोशी प्रदेशया जिल्ला शीतल जूगु दु । खुसिबाः पूर्वानुमान महाशाखां ल बुधवाःनिसें कोशी प्रदेशया खुसिइ खुसिबाः वयाः लःया सतह थाहाँ वइगु सुचं हे सार्वजनिक याःगु दु ।

मौसम पूर्वानुमान महाशाखां सार्वजनिक याःगु क्वाःगु फय् वइगु ख्याच्वःलिसेंया नक्सा । ह्याउँगु भागं अतिकं तांन्वइगु थाय् संकेत याइ ।

Categorized in राष्ट्रिय