zero media family planning adv

मधेस आन्दोलन सच्छिन्हु थ्यन सरकार धाःसा आतापाता

कालोबजारीया माध्यमं छुं भचा पेट्रोलियम पदार्थ व खाद्य सामानत आपूर्ति जुयाच्वंगुलि थःगु समस्या भचासां म्हो जुल धकाः खःला हाकुबजाःया कारणं सत्तारुढ दल व कर्मचारीतसें नं गैरकानुनी लाभ काये दयाच्वंगुलिं सरकार हाकुबजाः प्रतिमौन च्वना समस्याया समाधान यायेगु खँय् सक्रिय मजुयाच्वंगु । थ्व हे मौकाय् आयल निगमय् तःधंगु भ्रष्ट्राचार जुयाच्वंगु प्रष्ट जूगु दु । 

छथ्व समस्या समाधान मयासें देसयात अर्कमण्यताय् थाका लबः काये पल्केथूपिं नं यक्व पिहाँवःगु दु । मधेस आन्दोलनं सच्छिन्हु थ्यंगु इलय् तक थ्यना मधेस आन्दोलनयात सम्बोधन मयाकेगु सत्तारुढ व कांग्रेसया छथ्व अतिवादी नेतातसें हानं जिल्ला टुक्रा याये दइमखु धइगु कथंया प्रायोजित प्रदर्शन याकाः आन्दोलनयात उत्तेजित याकेत स्वयाच्वंगु दु । मुलुक ध्वगिक्क स्यंसा स्यं तर यथास्थिति वयाच्वंगु फाइदा उखेथुखे मलाकेगु उमिगु स्वार्थया नितिं देसयात बन्धकी तयेत नं उपिं तयार । तर दुःखि जुइमाःगु खँ थन दु कि थ्व सरकारया पतन जुइगुया दुःखः मखु तराई मधेसया आन्दोलन ताःहाकः जुल धाःसा नेपाःया भूभागं तराई मधेस धाःगु थाय् नं दु धइगु इतिहासय् जक ल्यनी धइगु अवस्था पिदनीन धइगुलिइ अवस्था थ्यन नं सत्तारुढ दलत न्रुयलं मचाःगु नेपाःया नितिं दुःखया खँ खः । 

संघीयताया विरुद्धया षडयन्त्रय् सत्तारुढ व प्रमुख प्रतिपक्षया नेता कार्यकर्तातय्त अझ नं सक्रिय याकाः आखिरय् प्रमुख दलतसें छु अपेक्षा याःगु खः । संघीयताय् वनेगु जुसेंलि गथे पुलांगु जिल्लाया सिमांकन यथावत तयातयेमाःगु अर्थ मदु तर थ्व खँयात थुइकाबिउगु स्वयां अखण्ड जिल्लाया नारा बिया संघीयतायात हे लागू मयाकेगु षडयन्त्र यानाः थ्व देय्या भविष्य ल्यनिला, ल्यनीमखु । थुकथंया अवरोध व षडयन्त्रया लिच्वः मुलुकं इतिहासय् हे अनुभव याये मलनीगु गृहयुद्ध निसें देसया अखण्डता नं ल्यंके फइमखु । अझ नं गुलिसितं लगे जुयाच्वंगु दु संघीयताय् हे मवंसा बरु देय् ल्यना च्वनीला तर फगत भ्रम जक खः अधिकारवादी आन्दोलनरत दलतनाप सहमति ज्यंका संघीयता लागू याये पूmसा जक देसया वर्तमान समस्यां सेफ ल्याण्डिङ्ग व नेपाःया अखण्डतायात ल्यंका तये फइगु खँ वाःचायेका माः । 

थौंकन्हे देसय् सरकार दु कि मदुगु अनुभव हे जनतां याये फयाच्वंगु मदु । पेट्रोलियम पदार्थनिसें अत्यावश्यक सामानत हाकुबजारय् प्रसस्त न्याये दु । थुकथं ध्यबा दुपिनिगु नितिं अझ नं थ्व समस्या समस्या जुयावःगु मदु । तर गरीव व मध्यम वर्गया जनताया दुगःक्वँय् गुबले त्वःधिइ धइगु अवस्थाय् थ्यने धुंकल तर सरकारं थ्व अवस्थां मुलुकयात याकनं पार यानाः क्यने धइगु विश्वास जनतायात बिइ फयाच्वंगु मदु । यक्व दिं न्ह्यः हे आः नाकाबन्दीया अन्त जुया आपूर्ति सहज जुइ धकाः फुर्तिका साथ घोषणा याःम्ह प्रधानमन्त्रीया घोषणा गन सुना वन लिसः तकं मदु । हानं एमाओवादीया मेम्ह नेता गुम्ह उर्जा मन्त्री धाःम्हेसिनं ग्यास मदुसा मतं जनताया जाः बुके उकिं जाः थुइगु इलय् सुथय् बहनी लोडसेडिङ्ग जुइमखु धकाः बकाइदा न्ववाम्ह उपप्रधानमन्त्री टोपबहादुरया घोषणा थःगु हे मन्त्रालयया विद्युत प्राधिकरणं उत्साहकासाथ उल्लंघन यानाः जाः थुइगु इलय् हे लोडसेडिङ्ग यानाः नेपाःया प्रधानमन्त्री उपप्रधानमन्त्री धाःपिं गुलि हल्का व असक्षम खः धइगु प्रमाणित यानाः हे क्यना बिइ धुंकल । सरकारं नागरिकताया फोटोकपि कयाः सिं मियाःगु ज्यायात हे तःधंगु उपलब्धि कथं क्यनेगु अवस्थाय् सरकार थ्यंगु दु । 

सरकार ख्वय् ला न्हिलेया अवस्था हःपिं सुं नं मखु, मू दलतय् अर्कमन्यताया कारणं हे थ्व अवस्थाया सिर्जना जूगु खः । थुकथं म्वासां म्वासां जनतां दुःख फयेमाःगु अवस्था हःपिं नं थ्व हे मू दलया शीर्ष नेतात हे खः । सरकारं गुबलें भारतं नाकाबन्दी यात धाइ अले सरकारं हे थ्व थ्व नाकां थुलि थुलि सामान चिकं वल धकाः नं धयाच्वनी । नाकाबन्दी भारतं याःगु खःकि तराई मधेसया आन्दोलनया कारणं सिर्जना जूगु खः स्पष्ट याये फयाच्वंगु मदु । न त भारतनाप हे कुटनीतिक पहल यानाः सरकारं धाःगु नाकाबन्दी चिके फु न त आन्दोलनरत दलतनाप हे सम्झौता यानाः थौंकन्हेया समस्याया समाधान यायेगुलिइ सक्रियता क्यनेफु । थुज्वःगु अर्कमन्यताया अवस्थाया कारणं नेपाःया आर्थिक वृद्धि माइनसय् वनाः पंचायतकालय् हे मजूगु देय्या अधोगतिया वाहक थ्व हे मू दलत जूगु दु । थ्व अवस्थाय् स्वनिगःया जनता थम्हेसिनं फयेमालाच्वंगु दुःखया कारण भारतया नाकाबन्दी धकाः जक च्वनाच्वन धाःसा थ्व सरकारं झीतं धलं धलं ब्वाका म्वाय् चुइकि । 

सरकारय् दुपिन्त वर्तमान समस्यां असर लाकाच्वंगु मदु । उमिगु गाडीया नितिं चिकं व भुतुयात माःगु ग्यास माक्व दु । उलि जक मखुकि सुरक्षाया नितिं धकाः न्रुयःने लिउने सुरक्षा निकायया पछुवा गाडी तयाः माकः फुँइ यायां लिमला । उमिगु सिफारिसय् थःथिति कार्यकर्तातसें पेट्रोल ग्यास नं काये दयाच्वंगु दुु । अले पेट्रोल ग्यास इनिपिसं नं सरकारी नेता कार्यकर्तातय्त झिगः इनाः नीगः हाकुबजारय् छ्वया गैरकानुनी मुनाफा कमे यानाच्वंसां सरकार पाकः जुया स्वयेगु बाहेक मेगु छुं याये मपूm । सच्छि नं मवंगु चिकं सरकारं इमरजेन्सी धकाः हवाई जहाजया चिकं निसलं मिया हाकुबजाः सरकारं हे यानाच्वंगु स्पष्ट दु । नेपालय् सच्छिं मियाच्वंगु अले चीनं हये धाःगु चिकं निसः थ्यनीगु प्रक्षेपण वये धुंकल । चीनं अनुदानय् बिउगु चिकं केरुङ्गय् हे नेपाःया ध्यबा सच्छि व स्वीतका थ्यं धइगु बिल वयेधुंकल । अले उकथं सितिकं वःगु चिकं देय्या विकास निर्माणया नितिं वइगु अनुदान नं क्वपालीगु धकाः नं चीनं धायेधुंकल । देस विकास यायेमाःगु ध्यबा चिकलय् फुका सरकारं भिंगु ज्या यानाः धकाः अखतं भारतया क्यनाः धकाः थःगु मूर्खता प्रदर्शन यायेत नं मन्त्रीतय् धें धें बल्ला शुरु जूगु खंगु हे खः । थुकथं एमालेया प्रधानमन्त्री ओलि नापनापं सरकारय् दुपिं एमाओवादी नं थुगसी पूर्ण असफल जुइगु लँपुइ दु । हाकु बजाःयात नियन्त्रण यायेगु ज्याया भाला कयाच्वंगु निगू मन्त्रालय गृहमन्त्रालय व आपूर्ति मन्त्रालयय् एमाओवादीया हे मन्त्री नं चले यानाच्वंगु खः । उमिसं न आपूर्ति सहज यायेत पहल याये फत न त हाकु बजाः नियन्त्रण यायेगु मामिलाय् हे छुं पलाः न्ह्याके फत ।