prabhu baink new

मचा छम्ह चीधी तुतु नये धाइ...धुंकाः ...हायेकाः नइगु ई... ज्वनाः किपूया भुवन महर्जन (भिडियो)

नेवा: अनलाइन न्युज – ललेन्द्र शाक्य | २०७७ आश्विन ३०, शुक्रबार १४:३४:५२

धात्थें धायेगु खःसा म्ये च्वयेगु व संगीत ख्यलय् पलाः लाःगु हे थः काय् भाजुया प्रेरणां धायेमाल ।

किपू नगरपालिका २ वडा द्यःध्वाखा त्वाःया भुवन महर्जनं वंगु दँय् ...मचा छम्ह चीधी तुतु नये धाइ... बोलया मचाम्येया म्यूजिक भिडियो सार्वजनिक यासें थःगु सांगितिक कलायात्रा न्ह्याकूगु खः । थ्वहे न्हापांगु म्येपाखें हे भुवन महर्जनयात छम्ह नवोदित गायकया रुपं संगीतह्यःमिपिन्सं म्हस्यूगु खः । थुगु हे म्येपाखें संसार क्रियसन्सं अवार्डय् भुवन महर्जन नवोदित गायक विधाय् टप १० दुने नोमिनेट जूगु खःसा थ्वहे म्येपाखें क्यामेरा पर्सन योवन शाक्यं बेष्ट क्यामेरा पर्सनया अवार्ड त्याकूगु खः । अथेहे, थुगु हे म्येपाखें मेकअप आर्टिष्ट मतिना महर्जनं समाः विधाय् बेष्ट टप १० य् नोमिनेट जूगु खः ।

आः वयाः हाकनं भुवन महर्जनया निक्वःगु देछा कथं ...मचा छम्ह चीधी तुतु नये धाइ...या निगूगु ब्व कथं ...हायेकाः नइगु ई...म्ये सिर्जना याःगु दु । थःगु हे च्वसाय्, संगीतय् अले सलं पिहाँ वइगु थुगु म्ये रिकर्डिंग ज्याझ्वः येँया क्षेत्रपातिइ च्वंगु संगीतकःमि सुरेन्द्र श्रेष्ठया सूर मेलोडी स्टुडियोस जुयाच्वंगु दु । थुगु म्येया संगीत संयोजक नांजाःम्ह संगीतकःमि जीवित जल्मी खः ।

खयतला, ...मचा छम्ह चीधी तुतु नये धाइ...म्ये नं स्वयं गायक भुवन महर्जनया हे च्वसाय्, लसय् व सलय् पिदंगु म्ये खःसा स्टुडियो नं सूरमेलोडी व संगीत संयोजक नं जीवित जल्मी हे खः ।

किपूया छम्ह बांलाःम्ह भलिबल कासामि गुकथं म्येच्वमि, लय् चिनामि व गायक जुल धैगु खँय् भुवन महर्जनयात मचांनिसें म्हस्यूपिनिगु दथुइ कौतुहलताया विषय जुयाच्वंगु दु । थुगु विषयस भुवन महर्जनं धयादी, स्वदँति न्ह्यः जि कायभाजु जन्म जूगु इलय्, जिं ...मचा छम्ह चीधी तुतु नये धाइ...म्ये च्वयागु खः । मचायात स्वस्वं हे अथेंहे म्येग्वःया खँग्वःत पिहाँ वल । लिपा लसय् नं हनेगु बानी जुल । म्ये च्वया लसय् हनेधुंकाः निदँ लिपा वंगु दँय् थुगु म्ये रिकर्ड जुयाः म्यूजिक भिडियोया रुपं पिहाँ वल । धात्थें धायेगु खःसा म्ये च्वयेगु व संगीत ख्यलय् पलाः लाःगु हे थः काय् भाजुया प्रेरणां धायेमाल । भलिबल कासामि ला पक्कां हे खः जि । आः जिं संगीत ख्यलय् नं पलाः न्ह्याकागु दु । स्वये गुलि सुथां लाइ ।

भाजु भुवन महर्जनं आः ...हायेकाः नइगु ई...बोलया म्ये ज्वनाः थःगु सांगितिक यात्राया निगूगु ब्व ज्वनाः वयाच्वंगु दु । थुगु म्येयात भुवन महर्जनं ...मचा छम्ह चीधी तुतु नये धाइ...या निगूगु ब्व कथं सार्वजनिक यायेत्यंगु दु ।

दुरु त्वंम्ह मचा भच्चा तःधी जुइधुंकाः, भच्चा भासं सीधुंकाः मचात जिद्दी जुइगु, छु यायेमते धाल वहे याइगु, पिरेयाइगु इत्यादी यथार्थ परिवेशयात कःघानाः ...हायेकाः नइगु ई...म्ये पिथने त्यनागु जानकारी नं भाजु महर्जनं ब्यूगु दु ।

भुवन महर्जनं थुगु म्ये फयांफतले थ्वहे वइगु स्वन्ति व न्हूदँ ने.सं. ११४१ या लसताय् पिथनेगु कुतः यानाच्वनागु जानकारी ब्यूगु दु ।

भाजु महर्जनं ...हायेकाः नइगु ई...म्येया म्यूजिक भिडियो निर्माणया झ्वलय् पुलांगु हे टिम दुथ्याइगु जानकारी नं ब्यूगु दु । वकथं क्यामेरा पर्सन लिसें म्यूजिक भिडियोया सम्पादन योवन शाक्यं याइगु जूगु दुसा म्यूजिक भिडियोया निर्देशन ललेन्द्र शाक्यं याइ । अथेहे, कलाकारय् रुपेन श्रेष्ठ थक्वाःमिया लिसें सरीता बज्राचार्य व थीथी मचाकलाकारपिनिगु सहभागिता दइगु जानकारी नं भुवन महर्जन ब्यूगु दु ।

अथेहे, म्ये रिकर्डया झ्वलय् जीवित जल्मीया संगीत संयोजनय् क्यान्टाटा ब्याण्डया गितारिष्टपिं बेस गितारिष्ट सुमन बज्राचार्यं बेस गितार व भुषणराज बज्राचार्यं लीड व रिदम गितार थानादीगु दु धकाः नं भुवन महर्जनं जानकारी ब्यूगु दु । भाजु महर्जनं आः पिदनेत्यंगु ...हायेकाः नइगु ई...म्ये न्हापाया म्येसिबें फरक व स्तरीय यायेगुलि थःपिं न्ह्यचिलाः च्वनागु खँ नं कंगु दु ।

थौंकन्हय् खयतला नेपालभाषा साहित्य व संगीत ख्यलय् मचा म्ये च्वइपिं तनेधुंकल । अग्रजपिं जनकवि दुर्गालाल श्रेष्ठ व लोककवि लिसें मचाकवि राजभाई जकःमिपिं मचा म्ये सिर्जना यायेगुलि न्ह्यःने लाःपिं अग्रजपिं खः । तर वय्कःपिन्सं नं मचा म्ये च्वयेगु थौंकन्हय् त्वःफिकाच्वंगु दु । थुज्वःगु इलय् किपूया भुवन महर्जनं मचा म्ये थःम्हं तुं च्वया, लसय् हनाः अले सः बियाः नेपालभाषा साहित्य व संगीत ख्यःया धुकुतिइ मचा म्ये मुंकेगु ज्या याःगु धैगु छगू च्वछायेबहःगु पलाः खः धकाः धायेछिं ।

(थन क्लीक यानाः भुवन महर्जनया मचा छम्ह चीधी तुतु नये धाइ...म्यूजिक भिडियो स्वयादिसँ)

Categorized in कला