coved ad

मचापिन्त तयारी प्याकेटया नसाज्वलं मनकेत विद्यालययात निर्देशन

नेवा: अनलाइन न्युज – ललेन्द्र शाक्य | २०७८ मङ्सिर २३, बिहिबार १५:५९:१६

शिक्षा व मानव स्रोत विकास केन्द्र (विद्यालय शिक्षा मापदण्ड निर्धारण शाखां) विद्यालययात तयारी प्याकेटया नसाज्वलं मचापिन्त मनकेत निर्देशन ब्यूगु दु ।

केन्द्रं फुक्क स्थानीय तहयात निर्देशन बिसें छुं छुं विद्यालयं बजारं तयारी प्याकेटया नसाज्वलं न्यानाः नकेगु यानाच्वंगु धैगु जानकारी वःगुलिं उज्वःगु तयारी नसाज्वलं मनकेत निर्देशन ब्यूगु खः ।

केन्द्रं सुचं सार्वजनिक यासें सरकारया नीति अःखः व मचापिनिगु स्वास्थ्य संवेदनशीलताय् लिच्वः लाकीगु व स्थानीय कृषकपिनिगु आय स्तरय् सुधार यायेगु तकं न्हिनसिया नसाज्वलंया लक्ष्य दूगु उगु क्षेत्रय् निरुत्साहन जुइगु ज्या मयाकेत निर्देशन ब्यूगु दु ।

थुकिया लिसेलिसें स्थानीय स्तरय् उत्पादन जूगु नसाज्वलंया छ्यलाबुला यानाः विद्यालयं वाःपतिकंया नसाज्वलं मेनु तयार यानाः मापदण्ड कथं नसाज्वलं तयार यानाः ताजा सफा व सन्तुलित नसाज्वलं नकेगु व्यवस्था यायेत तकं केन्द्रं निर्देशन ब्यूगु दु ।

सरकारं आर्थिक दँ २०७७÷०७८ निसें देय् न्यंकंया फुक्क सामुदायिक विद्यालयया प्रारम्भिक बालविकासनिसें न्यागू तगिंतकया मचापिनिगु नितिं न्हिनसिया नसाज्वलंया व्यवस्था यानाः वयाच्वंगु दु ।

Categorized in राष्ट्रिय