1142 nhoo dan adv

मचापिन्त खोप छाय् बिइमाः ?

नेवा: अनलाइन न्युज | २०७८ जेठ ९, आइतबार १२:०३:२७

थौंकन्हय् ब्वलनाच्वंगु महामारीइ यक्वसिनं न्यनाः वयाच्वंगु नां खः, खोप । खोपं प्रतिरक्षा प्रणाली बल्लाकी व खोपपाखें सम्भावित गुलिखे ल्वय् पाखें तापाक्क तयाबिइ । खासयानाः नकतिनि बूपिं मचातय्गु प्रतिरक्षा प्रणाली अतिकं कमजोर जुइ । उकिं इमित चिचीधंगु ल्वचं नं आपालं हे ख्यानाच्वनी । इमित जुइगु गुलिखे ल्वय् विरुद्ध खोप बिइगु याइ । थथे इलय् हे खोप बिइधुंकाः उपिं मचात सम्भावित ल्वय् पाखें तापाक्क च्वनेफइ ।

यदि इलय् हे इमित खोप मबिल धाःसा तच्वःगु ल्वय् जुइफूगु ग्याःचिकु ब्वलनी ।

दुःखया खँ, हलिंया बच्छिसिबें अप्वः मचात आःतकं नं खतरनाक ल्वय् पाखें सुरक्षा जुइगु खोप काये खनाच्वंगु मदुनि । यदि इलय् हे खोप कायेफूगु अवस्थाय् दँय् दसं १५ लखसिबें अप्वः नकतिनि बूपिं मचातय्त मृत्युपाखें बचेयायेफइगु खः ।

छाय् मचापिन्त खोप बिइमाःगु खः ? थुकिया मू प्यंगू हुनि दु ।

प्रतिरक्षा प्रणाली बल्लाकी :

परिपक्क मनूतय्गु प्रतिरक्षा प्रणालीं मनूतय्त प्राकृतिक रुपं रोगव्याधीपाखें तापाक्क तइ । अय्सां मचातय्गु प्रतिरक्षा प्रणाली उलिं यक्व विकसित जुइमखु । उकिं गुलिखे ल्वचं मचातय्त अःपुक हे व याकनं थियाबिइ  खोपं इमिके थुज्वःगु जोखिम म्हो यानाबिइ । गुलिखे सम्भावित ल्वचं तापाकं तयाबिइ ।

प्राणघातक ल्वय् पाखें सुरक्षा :

गुम्ह मचायात खोप बियातःगु मदु जुइ, इमित याकनं संक्रमण जुइगु जोखिम दइ । उकिं मचातय्गु नितिं खोप जरुरी जू । डिप्थेरिया, टिटनास इत्यादी ल्वचं तापाक्क तयेगु नितिं मचातय्त इलय् हे खोप बिइमाः ।

पायछिगु इलय् ल्वय् प्रतिरोधी क्षमता अप्वयेकी :

खोप कायेधुंकाः म्हगः दुने एन्टिबडी विकास जुइत ई काइ । उकिं खोप काःगु छुं ईलिपा जक उकिया लिच्वः खनेदइ । थ्वहे हुनिं नकतिनि बूपिं मचातय्त पायछिगु इलय् हे खोप बिइमाः, गुकिं यानाः ल्वय् जुइन्ह्यः हे मचातय्गु म्हगलय् प्रतिरोधी क्षमता विकास जुइधुंकूगु जुइ ।

थ्व झीगु सामाजिक जिम्मेवारी :

सुं नं मचायात पायछिगु इलय् हे खोप बिइधुंकाः इमित भविष्यय् तच्वःगु ल्वय् जुइगु खतरा म्हो जुइ । तःधिकः जुइबलय् नं इपिं स्वस्थ व निरोगी जुइमा धैगु आज्जुं इमित चीधिकःबलय् हे खोप बिइमाः । थ्व झीगु सामाजिक जिम्मेवारी नं खः । थुकिं कन्हय् जुइगु ल्वय् पाखेंया जटिलता, उपचार खर्च, ई, श्रमयात नं मुंकाः तयेफइ ।