मचाती जात्रा (किपा ग्यालरी)
- रेखा शाक्य
दँयसं तछलागा अष्टमी भलभलाष्टमीया दिं पशुपतिया देवपतन (ग्वल) जयबागेश्वरीइ न्यायेकीगु मचाती जात्रा थुगुसी नं अनया नेवाःतयसं न्यायेकूगु दु ।
किम्बदन्ती कथं ग्वल लागाय् मस्तय्त राक्षसपिंसं नयेगु याःगु व थुकिया बदला कायेगु निंतिं राक्षसया मस्तयत नं त्रिशूलय् तियाः आवंनिसें मस्तयत मनयेगु शर्तय् त्वःताछ्वःगु खः । थुकिया हे लुमन्तिइ मचाती जात्रा न्ह्याकावयाच्वंगु जनविश्वास दु । ग्वल देय् (थौंकन्हयया जगबागेश्वरी)या बन्धुदत्त आचार्यया काय् कलाःम्हेसिया अविश्वासया कारणं सीगुलिं काययात तकं बचे यायेमफुम्ह धकाः ग्वलबासीतयसं थुगु जात्राय् येँ दुनेया सहरया बासिन्दापिंत म्हुतु वाइगु चलन नं दु ।
थुगु जात्रा मल्ल जुजु यक्ष मल्लं ने.सं. ६३४ निसें न्ह्याकूगु धाइ । बत्श्लेश्वरीया पुजारी लिसें साधु व तान्त्रिकाचार्य मुनिबन्धुं दकलय् न्हापां थुगु जात्रा न्ह्याकूगु धइगु जनविश्वास दु । न्हापा तान्त्रिक विधिविधान कथं गुंगू रथय् गुम्ह हे कुमार व कुमारीपिंत तयाः इशानेश्वर महाद्यः चाःहिइकीगु चलन दुगु खः । तर आर्थिक अभावया हुनिं थांैकन्हय् स्वंगू जक खतय् जात्रा जुयाच्वंगु दु । नियम कथं गणेश, भैरव व कुमारया लिसें गुम्ह कुमारीपिनि जात्रा जुइगु खः । तर कुमारी जुइपिं सर्वलक्षण दुपिं व गुगुं कथं रक्तश्राव मजूपिं मिसामस्त मालीगु जूगुलिं गुंगू रथया पलेसा स्वंगू जक रथय् सीमित जूगु दु । जयबागेश्वरीया भण्डार तहबिलया छगू खतय् गणेश, कुमार व कुमारी बिज्याकी । अथेहे मेगु खतय् कुमार जक बिज्याकाः पशुपतिया बज्र छेँपाखें थनीसा स्वंगू खतय् श्री बत्श्लेश्वरी लिक्कसं दुगु जयमंगलदेवीया थासय् ल्ह्वनी ।