Header Nepal rastra bank Adv

मचातय्त न्हापांगु मात्राया फाइजर बायोएनटेक खोप

नेवा: अनलाइन न्युज – ललेन्द्र शाक्य | २०७९ आषाढ ९, बिहिबार १६:००:४२

थौं बिहिवाःनिसें न्यादं च्वय् व १२ दं क्वय् च्वंपिं मचापिन्त कोरोनाविरुद्धया न्हापांगु मात्रा खोप बिइगु अभियान न्ह्याकूगु दु । मचातय्त थः ब्वनाच्वंगु स्कूलय् हे खोप बिइगु व्यवस्था मिलेयाःगु खः ।

मचातय्त फाइजर बायोएनटेक खोप ब्यूगु खः । थ्व खोप मचातय्त ०.२ एमएलया दरं निगू डोज बिइगु याइ ।

जिल्ला स्वास्थ्य ज्याकुथि येँया प्रमुख बसन्त अधिकारीं थ्व खोपया प्रभावकारिता ९१ प्रतिशत दूगु धासें धुक्क जुयाः खोप कायेत इनाप याःगु खः ।

न्हापांगु चरणय् स्वनिगःलिसें २७ गू जिल्लाय् असार ९ गते थौंनिसें १५ गतेतक न्हापांगु मात्रा खोप बिइगु अभियान न्ह्याकूगु दुसा निगूगु मात्राया अभियान वइगु साउन २ निसें ८ गतेतक न्ह्याकेगु जानकारी ब्यूगु दु ।

ल्यंदूगु जिल्लाय् धाःसा भाद्र ५ गतेनिसें ११ गतेतक न्हापांगु मात्रा अभियान व भाद्र २७ गतेनिसें असोज १ गतेतक निगूगु मात्रा खोप अभियान न्ह्याकेगु स्वास्थ्य व जनसंख्या मन्त्रालयं तयारी याःगु दु ।

Categorized in राष्ट्रिय