nepal investment baink

मगन इन्टरटेन्टमेन्टया “वया मां जि...” व “आएँ आमा म...” म्यूजिक भिडियो पिदन

नेवा: अनलाइन न्युज – ललेन्द्र शाक्य | ने.सं. ११४४ सिल्लागा पंचमी

किपूया मगन इन्टरटेन्टमेन्टया लुखां “वया मां जिं...” बोलया नेपालभाषाया म्यूजिक भिडियो पिदंगु दु । अथेहे, थुगु हे म्येया खस नेपाली भाषा भर्सन “आएँ आमा म...” बोलया म्येया म्यूजिक भिडियो नं सार्वजनिक जूगु दु ।

थुगु निपुं म्यूजिक भिडियो बिहिवाः किपूया पांगाय् च्वंगु कीर्तिपुर सिनेप्लेक्स हलय् प्रिमियर शो यानाः सार्वजनिक जूगु खः ।

“गाउँ गाउँबाट उठ, बस्ती बस्तीबाट उठ...” थें जाःगु आपालं लोकंह्वाःगु जनवादी कालजयी म्येया च्वमि श्याम तमोटं च्वयादीगु नेपालभाषाया “वया मां जि...” व थुगु हे म्येया खस नेपाली भाषा भर्सन “आएँ आमा म...” म्ये मांयात लुमंकाः मांया समर्पणय् दुग्यंगु भाव पिज्वयाच्वंगु म्ये खःसा सार्वजनिक जूगु म्यूजिक भिडियों म्येयात जीवन्त यायेत ताःलाःगु दु ।

थुगु म्येया लय् चिनामि व संगीत संयोजक नांजाःम्ह संगीतकःमि सुरेन्द्र श्रेष्ठ खः ।

नेपालभाषाया “वया मां जि...” लोकंह्वाःम्ह म्येहालामि रत्नशोभा महर्जनं हालादीगु दुसा खस नेपाली भाषा भर्सन “आएँ आमा म...” लय् चिनामि व संगीत संयोजक सुरेन्द्र श्रेष्ठं हालादीगु दु ।

क्वान्टिटीसिबें क्वालिटी भिडियोयात प्राथमिकता बियाः वयाच्वंगु किपूया मगन इन्टरटेन्टमेन्टया लुखां पिदंगु थुगु निपू म्येया म्यूजिक भिडियोया निर्देशन युवा फिल्ममेकर रजिन महर्जनं यानादीगु दु ।

अथेहे, छुं ला (महिना) न्ह्यः जक मगन इन्टरटेन्टमेन्टया लुखां रजिन महर्जनया हे निर्देशनय् लोकंह्वाःम्ह म्येहालामि जुजुकाजी रंजित व म्येच्वमि आर. मानन्धरया च्वसां पिदंगु नेपालभाषाया लोकंह्वाःगु म्ये “छंगु म्हगः गुलि बांलाः...” म्यूजिक भिडियो मगनया अफिसियल यूट्युब च्यानलं पिदने धुंकूगु दु ।

अथेहे, मगन इन्टरटेन्टमेन्टया लुखां हे थ्वसिबें ह्यः किपूया भुवन महर्जनया च्वसा व लसय् अथेहेहङकङय् च्वनादीम्ह राजेन्द्र डंगोलया सलय् व सुरेन्द्र श्रेष्ठया संगीत संयोजनय् आपालं थीथी अवार्डत्याकेत ताःलाःगु “व मनू सु मनू...” म्येया म्यूजिक भिडियो नं मगनया अफिसियल यूट्युव च्यानलं पिदने धुंकूगु दु ।

बिहिवाः सार्वजनिक जूगु“वया मां जि...” व “आएँ आमा म...” म्यूजिक भिडियो पितब्वज्या प्रिमियर शो ज्याझ्वलय् म्येच्वमि श्याम तमोटलिसें लोकंह्वाःम्ह संगीतकःमि रामेश श्रेष्ठ, ख्यालिजुजु मदनकृष्ण श्रेष्ठ, म्येहालामि रमना श्रेष्ठ, संगीता शाक्यलिसें आपालं संगीतकःमिपिनिगु उपस्थिति दूगुखः ।

ज्याझ्वः म्येहालामि दिपा महर्जनं न्ह्याकादीगु खः ।

Categorized in कला