prabhu baink new

मखूगु भ्याक्सिन बिल : दोलखाय् खिचां न्याःपिंमध्ये स्वम्ह सित

नेवा: अनलाइन न्युज – ललेन्द्र शाक्य | २०७७ भाद्र ११, बिहिबार ०९:१७:०४

लत्या न्ह्यः दक्षिणी दोलखाया मेलुंग गाउँपालिकाय् लाछि खिचां न्याःपिंमध्ये स्वम्ह मनू सीगु दु ।

असार २६ गते मेलुंग गाउँपालिका ६ तिनपिप्लेय् निघौया अवधिइ लाछि खिचां १० म्हेसित न्याःगु खः । उपिंमध्ये थीथी इलय् स्वम्ह मिजंत सीगु दु ।

मेलुंग गाउँपालिका ६ तिनपिप्लेया ३२ दँया रामचन्द्र भण्डारी बुधवाः सुथय् पाटन अस्पतालय् सीधुंकाः लाछि खिचां न्यानाः सीगु घटना पिने वःगु खः ।

रेविज ल्वय्या हे हुनिं भण्डारी सीगु पाटन अस्पताल यलं पुष्टि याःगु मेलुंग गाउँपालिका स्वास्थ्य शाखाया प्रमुख हरिराम चापागाइँ नं जानकारी ब्यूगु दु । गाउँपालिकां काःगु तथ्यांकय् १० म्हेसित लाछि खिचां न्याःगु व ल्यंदुपिं ७ म्हेसिके रेविज ल्वय्या लक्षण खनेमदूगु  शाखा प्रमुख चापागाइँ नं धाःगु दु ।

लाछि खिचां न्यानाः सीपिं मेलुंग गाउँपालिका ५ या १५ दँया सुरेश विक व बैत्यश्वर गाउँपालिका छेँ दुम्ह मेलुंगय् पाजुपिन्थाय् वंगु इलय् खिचां न्यानाः घाःपाः जुयाः प्राथमिक स्वास्थ्य केन्द्र चरिकोटय् वासः यायेगु झ्वलय् ८ दँया कुशल नेपाली सीगु मेलुंग गाउँपालिका ६ या वडाध्यक्ष राजुकुसुम लामां जानकारी ब्यूगु दु ।

म्हिगः बुधवाः सीम्ह भण्डारीयात मेलुंग गाउँपालिका ६ स च्वंगु स्थानीय मेडिकलं रेविज ल्वय्या मखूगु (गलत) भ्याक्सिन ब्यूगु द्वपनय् स्थानीयपिन्सं मेडिकल तोडफोड याःगु प्रहरीं जानकारी ब्यूगु दु ।

सीएमए पास यानाः स्थानीय बजारय् मेडिकल व फार्मेसी पसः चायेकाःतःम्ह स्वास्थ्यकःमिं रेविज विरुद्धया भ्याक्सिन ब्यूगु सीदुगुलिं प्रहरीं नियन्त्रणय् कयाः चरिकोट हःगु खः ।

(थौं बिहिवाः पिदंगु अन्नपूर्ण पोष्ट न्हिपौपाखें)

Categorized in पत्रपत्रिका