Arin Enterprises

मंसीर १५ गते दुने मेलम्चीया लः स्वनिगलय्

नेवा: अनलाइन न्युज – ललेन्द्र शाक्य | २०७९ कार्तिक २९, मंगलबार ११:३२:३७

वा वःगु हुनिं दुनावःगु मेलम्ची खानेपानी आयोजनाया हेडवर्कसतक थ्यनीगु पहुँचमार्ग तयार जुइधुंकाः मेलम्चीया हेडवर्कस क्षेत्रय् मुनाच्वंगु गेग्रान चिइकेगु ज्या न्ह्याकूगु दु ।

मेलम्ची खानेपानी विकास समितिया कथं मेलम्ची खुसिं आयोजनाया हेडवर्कस क्षेत्रय् मुंगु गेग्रान सोमवाः चिइकेगु ज्या चिनियाँ निर्माण कम्पनी सिनो हाइड्रो पावरं न्ह्याकूगु दु ।

वा वये न्ह्यः वंगु जेठ निगूगु वाःनिसें हे आयोजनाया हेडवर्कस क्षेत्रय् च्वंगु संरचना व सुरुङ बचेयायेत आयोजनां मेलम्चीया सुरुङय् लः पथान्तरण ज्या दिकूगु खः ।

मेलम्ची खानेपानी विकास समितिया कार्यकारी निर्देशक कमलराज श्रेष्ठं मेलम्चीया सुरुङया मू पोर्टल क्षेत्रय् छुं नं प्राविधिक समस्या खनेमदूगु खण्डय् मेलम्चीया लः स्वनिगलय् मंसीर १५ गते दुने हे हयेफइगु धाःगु दु ।

श्रेष्ठं धाःगु दु, ‘आः हेडवर्कस क्षेत्रय् मुनाच्वंगु गेग्रान ८ निसें १० न्हुया दुने सफा यायेगु जुइ । माःगु मेमेगु ज्इा क्वचायेकाः मंसीर १५ गते दुने हे मेलम्चीया लः सुरुङय् कुर्केगु ज्या धलः तयार यानागु दु ।’

Categorized in बजाः