prabhu baink new

मंकाः खलःया नामय् जग्गा पास निदँया दुने मंकाः दबूछेँ दने सिधयेकेगु लक्ष्य

नेवा: अनलाइन न्युज – ललेन्द्र शाक्य | २०७७ आषाढ २४, बुधबार ००:०१:१३

नेपालभाषा मंकाः खलकं न्याना तःगु व झी कवि चित्तधर हृदयं दान यानातःगु जग्गा अन्ततः मंकाः खलःया हे नामय् संस्थागत रुपं दर्ता जूगु दु । म्हिगः मालपोत कार्यालयय् मंकाः खलःया नामय् संस्थागत रुपं उगु जग्गा नामसारी यायेगु ज्या जूगु खः ।

नेपालभाषा मंकाः खलकं थःगु हे दबूछेँ दनेगु ताः तयाः उगु जग्गा न्याना तःगु खः । थनिं स्वंगू दशक न्ह्यः मंकाः खलःपाखें दँय्दसं यःमरि पुन्हि कुन्हु त्यःछिंत्यः फ्वनाः मुंगु ध्यबापाखें उगु जग्गा न्याना तःगु खः । लिसें उकिया नापसं च्वंगु छकू जग्गा झी कवि चित्तधर हृदयं मंकाः खलःयात दान कथं बियादीगु खः । निगुलिं यानाः आः मंकाः खलःया नामय् मुक्कं २६ आना 

(८४२ वर्ग मिटर) जग्गा दर्ता जूगु दु । येँ मनपा १५ वडास्थित होटल वज्रया लिउनेसं थ्व जग्गा लानाच्वंगु दु ।  

मंकाः खलः विधिवत् रुपं दर्ता मजूनिगु जुयाः अबलय् मंकाः खलःया तत्कालीन पदाधिकारीपिं नायः पद्मरत्न तुलाधर, न्वकु दुर्गालाल श्रेष्ठ, छ्यांज्ये मल्ल के. सुन्दर व दांभरि काजीलाल श्रेष्ठया नामय् उगु जग्गा दर्ता यानातःगु खः । म्हिगः येँया कलंकीस्थित मालपोत ज्याकुथी वनाः दुर्गालाल श्रेष्ठ, मल्ल के. सुन्दर, मदुम्ह पद्मरत्न तुलाधरया जहान निलशोभा तुलाधर व मदुम्ह काजीलाल श्रेष्ठया काय प्रविणलाल श्रेष्ठपिंसं सहर्ष उगु जग्गा मंकाः खलःया नामय् पास यानादीगु खः ।

जग्गा पास यायेगु लागिं मंकाः खलःया वर्तमान पदाधिकारीपिं, ग्वाहालि पुचःया दुजःपिं लिसें संघीय सांसद कृष्णगोपाल श्रेष्ठ नं मालपोत ज्याकुथी उपस्थित जुयादीगु खः । 

जग्गा पास यायेगु लागिं आवश्यक जूगु करिब ४० लाख तका बराबरया शुल्क नेपाल सरकारपाखें अनुदान स्वरुप प्राप्त जूगु खः ।  

थनिं दछि न्ह्यः तिनि जनकवि दुर्गालाल श्रेष्ठया अध्यक्षताय् नेपालभाषा मंकाः खलः विधिवत् रुपं दर्ता जूगु खः । संस्था दर्ता लिपा उगु जग्गाय् मंकाः खलःपाखें दबूछेँ दनेगु ज्या शुरु याःगु खः । दबूछेँ दनेगु लागिं येँ महानगरपालिकापाखें ५ करोड तका बजेट व्यवस्था याःगु खःसा येँ मनपाया मेयर विद्यासुन्दर शाक्यं दबूछेँया शिलान्यास समेत यानादीगु खः । आः निदँया दुने दबूछेँ निर्माण सम्पन्न यानाः मेयर शाक्यया ल्हातिं हे थुकिया उलेज्या यायेगु ताः तयातःगु दु । 

मंकाः खलःया दबूछेँय् छगू तःधंगु दबूया नापं थीथी ज्याकू व पार्किङया समेत व्यवस्था जुइगु खँ धाःगु दु । 

 

 

 

Categorized in नेवाः