nepal investment baink

भोताहितिइ इलय् हे लँ मदयेकल धाःसा कर्मचारीपिन्त निलम्बन यायेगु मेयर बालेनया ख्याच्वः

नेवा: अनलाइन न्युज – ललेन्द्र शाक्य | ने.सं. ११४४ चिल्लागा अस्तमि (२०८० चैत्र २० गते) मंगलवाः

येँ महानगरपालिकाया मेयर बालेन्द्र शाह बालेनं बैशाख ४ गते जनबहाःद्यःया रथ सालीगु दिं न्ह्यः हे भोताहितिइ लँ दयेकेगु ज्या क्वमचायेकल धाःसा सार्वजनिक निर्माण शाखाया कर्मचारीपिन्त निलम्बन यायेगु ख्याच्वः ब्यूगु दु ।

छुं दिं न्ह्यः जनबहाःद्यः रथजात्रा व्यवस्थापन समितिया दुजःपिं नापलायेगु झ्वलय् मेयर बालेनं थथे फोन यानाः सम्बन्धित निकायया प्रमुखयात थथे निलम्बन यायेगु ख्याच्वः ब्यूगु खः ।

समितिया नायः निलकाजी शाक्यं बियादीगु जानकारी कथं मेयर बालेनं थःपिनिगु न्ह्यःने हे सार्वजनिक निर्माण शाखाया प्रमुखयात फोन यानाः जनबहाःद्यःया रथ सालीगु लागा भोताहितिइ बैशाख ४ गते न्ह्यः हे लँ दयेके क्वमचाल धाःसा नगरपालिका जःखः हे मवयेत ख्वाच्वः बिसें गुगु नं हालतय् लँ दयेके क्वचायेकेत निर्देशन ब्यूगु खः ।

मेयर बालेनं जनबहाःद्यःया रथ सालीगु इलय् भोताहितिइ धः दयेकेगु नितिं म्हूगु गाः ल्हाकेगु जक मखुसे धू मब्वयेकेगु नितिं पीच यायेगु तयारी तकं यानागु खँ समितिया दुजःपिन्त जानकारी ब्यूगु खः ।

मेयर बालेनया निर्देशन लिपा भोताहितिइ युद्धस्तरय् लँ दयेकेगु ज्या न्ह्यानाच्वंगु दु ।

येँ महानगरपालिका २७ वडाया वडाध्यक्ष योगेश खड्गीं नेवाः अनलाइनन्यूजलिसे खँ ल्हासें लँ दयेकेगु ज्या थनी निन्हु स्वन्हुं हे क्वचाइगु व वयालिपा रथ सालेगु नितिं पायछि जू कि मजू थुकिया निरीक्षण बरिष्ठ इन्जीनियर, समितिया दुजःपिंव स्थानीय बासिन्दापिं च्वनाः यायेगु खँ कनादीगु दु ।

वडाध्यक्ष खड्गीं जात्रा न्ह्यः हे लँ दयेकेगु ज्या पूर्ण रुपं क्वचाइगु जानकारी नं बियादीगु दु ।

Categorized in स्थानिय-समाज