नेवा: अनलाइन न्युज – विजय रत्न | २०७९ श्रावण २०, शुक्रबार १५:३४:१५

चलचित्र विकास बोर्डया न्हूम्ह नायः भुवन केसीया छखे भिन्तुना फफं लिमलानाच्वंगु दुसा मेखे संकिपा लिसे स्वापू दुउगु संघसंस्थाया समस्या न्यना हे दिन बिते जुयाच्वंगु दु ।

थ्वहे झ्वलय् बुधवाः वयकलं संकिपा सम्बन्धी नेपाःया दक्वसिबे पुलांगु संस्था नेपाल चलचित्र संघ व आदिबासी मातृभाषी संकिपामिपिनिगु मंकाः संगठन आदिबासी जनजाति चलचित्र महासंघया प्रतिनिधि मण्डलपाखें देछाःगु भिन्तुना फयादीगु खः ।

थथे भिन्तुना फयाकायेगु झ्वलय् वयकलं संकिपा क्षेत्र व  थ्वलिसे स्वापू दुउगु समस्या बाँलाक हे सिउ धकाः धयादिसे अज्याःगु समस्या चिइकेगु कुतः याये धकाः धयादिल ।

नेपाल चलचित्र संघया ग्वसालय् बुधवाः जुउगु बधाई व हना ज्याझ्वलय् याकनं हे सकलें सरोकारवाला पक्षलिसे सहलह ब्याकाः छगू निष्कर्ष पिकाये धकाः नायः केसीं धयादिल ।

संघया नायः बीरेन्द्र नारायण श्रेष्ठया सभानायःसुइ जुउगु उगु ज्याझ्वलय् संघया पुलांम्ह नायः नकिम उद्दिनं सिनेमा हलया ल्याः म्हो जुया वंगुलिं चिन्ता प्वंकादिल । मेम्ह पुलांम्ह नायः प्रदिप उदयं विदेशी संकिपा क्यनावःगु विकास शुल्कपाखें नेपाली संकिपाया विकास यायेगु धइगु अव्यावहारिक चलन खः धकाः धयादिल ।

संघया निवर्तमान नायः मधुसुदन प्रधानं न्ह्याकादीगु ज्याझ्वलय् संघया पुलांम्ह नायः राजकुमार पोखरेल, कलाकार संघया नायः रविन्द्र खड्का, द्वन्द कलाकार संघया नायः नारायण प्रधान, प्राविधिक संघया नायः पुष्कर लामा लगायतया वक्तापिन्सं चलचित्र विकास बोर्डका न्हूम्ह नियुक्त नायः भुवन केसीयात भिन्तुना देछासे थःथःगु क्षेत्रया बारे न्ववानादीगु खः ।

बुधवाः हे जुउगु मेगु ज्याझ्वलय्  आदिबासी जनजाति चलचित्र महासंघया प्रतिनिधि मण्डललिसे  चलचित्र विकास बोर्डया न्हूम्ह नायः भुवन केसीं  विकास बोर्डया सभाकक्षय् नापलाना दिल । थथे नापलानादीगु इलय् महासंघया नायः अमृत सुनवारं आदिबासी जनजाति संकिपाया निर्माण इजाजतनिसें सेन्सरतकया समस्या न्ह्यथना दिेल  ।

थ्वहे इलय् महासंघपाखें बोर्डया न्हूम्ह नियुक्त नायः केसीयात भिन्तुना पौ नं देछागु खःसा आदिबासी जनजाति संकिपालिसे स्वापू दुगु समस्या ज्यंकेत इनाप यासे छगू ज्ञापन पौ नं लःल्हागु खः ।

थ्व ज्याझ्वलय् महासंघय् आवद्ध नेवाः संकिपामिपिनिगु संस्था नेवाः फिल्म सोसाइटीया नापनापं झिंखुगू जातीय समुदायया संकिपा सम्बद्ध संस्थाया प्रतिनिधि पिनिगु उपस्थिति दुउगु खः ।

Categorized in कला