नेवा: अनलाइन न्युज – ललेन्द्र शाक्य | २०८० भाद्र २०, बुधबार १६:२०:०८

नेपालभाषाया सांगितिक ख्यलय् न्हू पुस्ताया म्येहालामि आपालं वयाच्वंगु दुसाः पुलां पुस्ताया कलाकारपिनिगु नं न्हून्हूगु पलाः न्ह्यानाः वयाच्वंगु दु ।

छुं ई न्ह्यः जुजुभाई तुलाधर नांयाम्ह ज्याथःम्ह कलाकारं म्ये हालाः संगीत ख्यलय् पलाः न्ह्याकुगु खःसा आः वया भुपेन्द्रमान शाक्य नांयाम्ह छम्ह मेम्ह ज्याथःम्ह कलाकार म्येहालामि जुयाः पिदंवःगु दु । वयकलं हालादीगु  ‘म्हगसय् वया’ म्येया म्युजिक भिडियो बुधवाः पितब्वज्या जुगु खः ।

येँया सुन्धराया सीटीसी मलय् जूगु ज्याझ्वलय् ईन्जिनियर  गायक भुपेन्द्रमान शाक्यया सभानायसुइ नेपालभाषाया म्ये ‘म्हगसय् वया’या म्युजिक भिडियोया पितब्वज्या जूगु खःसा उगु ज्याझ्वलय् ई. बालसुन्दर मल्ल मूपाहाँ कथं झायादीगु खः ।

दर्शन वीर शाक्यं च्वयादीगु थ्व म्येयात सुरेन्द्र श्रेष्ठं लसय् हंसे संगीत एरेन्ज नं यानादीगु खःसा सोलो आलाप रत्नशोभा महर्जनं साथ बियातःगु दु ।

म्युजिक भिडियो दुने गायक थःहे व वयकःया जहान अन्नपूर्ण तुलाधर शाक्यया नापनापं अमोघवीर बज्राचार्य व नेपालभाषाया म्युजिक भिडियो ख्यलय् न्हापां खुशीइ अभिनय याःम्ह कलाकार सुमि मानन्धर व बालकलाकर संकिपा श्रेष्ठ व सहायक कलाकार उजय शाहीपिन्सं अभिनय यानातःगु दु ।

अन्नपूर्ण तुलाधर शाक्यं निर्माण यानादीगु म्युजिक भिडियोया निर्देशन बिस्वास बज्राचार्यं यानादीगु खः । सहायक निर्देशक मन्जिल शाक्य, सिनेम्याटोग्राफी व एडिटर कलर आकृष्ट शाक्य, मेकअप स्वेता शाक्य, भिएफएक्स बिजनराज बज्राचार्य, कोरियोग्राफी रोहिया महर्जनं यानादीगु थुकिया प्रोजेक्ट म्यानेजर उजय शाही ख ।

थ्व म्युजिक भिडियोयात कया म्येहालामि शाक्य, म्येच्वमि शाक्य, संगीतकार श्रेष्ठया लिसेलिसें सिने पत्रकार विजयरत्न असंबरे, सन्चारकःमि व संकिपा निर्देशक रामकृष्ण खडगी, संकिपाकःमि सुरेन्द्र तुलाधर, संकिपा निर्देशक रवि सायमिपिन्सं नुगःखँ तयादीगु खः ।

Categorized in कला