नेवा: अनलाइन न्युज | २०८० भाद्र १७, आइतबार १२:३०:५०

आईसीसी वुमन्स् टी–२० विश्वकप एसिया क्षेत्र छनोटय् नेपालं भुटानयात स्वंगू विकेटया जितलिसें सेमिफाइनलया सम्भावना बल्लाकूगु दु ।

नेपालं आः समूह चरणया निगू कासाय् कम्ती नं छगू जित पिकाइबलय् नेपाल सेमिफाइनल थ्यनीगु जूगु दु ।

भुटानं ब्यूगु ४० रनया सामान्य लक्ष्य पार याःगु नेपालं १३.२ ओभरय् ७ विकेट गुमेयानाः लक्ष्य पूवंकूगु खः ।

नेपाःया नितिं कप्तान रुबिना क्षेत्रीं सर्वाधिक १२ रनय् अविजित जुल ।

नेपालं ओपनर सीता राना मगर व कविता कुवँरयात अःपुक्क हे गुमेयायेमाःगु खः । सीतां ८ रन मुंकूबलय् कविता डकआउट जुल । अस्मिना कर्माचार्य, इन्दु वर्मा व सम्झना खड्का डकआउट जूबलय् नेपालं सहज लक्ष्य पूवंकेत नं संघर्ष यायेमाःगु खः ।

कविता जोशी ९ रनय् क्याच आउट जूबलय् पूजा स्वंगू रनय् क्याच आउट जूगु खःसा विन्दु रावल शून्यय् अविजित जूगु खः ।

भुटानया नितिं अञ्जु लीघलं सर्वाधिक स्वंगू विकेट काःगु खः । छिरिङ जाङ्मो, सोनम व अञ्जु गुरुङं छगू छगू विकेट काःगु खः ।

वसिबें न्ह्यः यूके एम–वाई एसडी क्रिकेट ओभलय् टस बुकाः ब्याटिङ याःगु भुटानं निर्धारित २० ओभरय् ८ विकेट गुमेयानाः ३९ रन दयेकूगु खः ।

भुटनाया नितिं कप्तान दिचान वाङ्मों सर्वाधिक २१ रन दयेकूगु खः । छिरिङ जाङ्मों ६ रन दयेकूगु खः ।

नेपाःया नितिं पुजा महतों सर्वाधिक स्वंगू विकेट काःगु खः । कविता कुँवर व रुविना क्षेत्रीं समान छगू छगू विकेट काःगु खः ।

नेपालं सोमवाः कतारलिसे व बुधवाः यूएईलिसे कासा म्हितीगु जूगु दु ।

Categorized in कासा