भुखाय् लिपा छिके नं थुज्वःगु लक्षण दु कि ?

नेवा: अनलाइन न्युज | २०७२ बैशाख २७, आइतबार १०:५८:०३

तःभुखाय् लिपा मनू सामान्य जुइ फयाच्वंगु मदु । अझ नं आपालं मनूतयके शारीरिक एवं मानिसक विचलन वयाच्वंगु दनि । तःभुखाय् लिपा मनूयात छु गुज्वःगु कथंया शारीरिक व मानसिक लिच्वः लाकाच्वंगु दु, थ्व बारे जनचेतनाया निंतिं थन छुं छुं खँ न्ह्यथनाच्वना ।

भुखाय् लिपा लाइगु मानसिक लिच्वःया लक्षण

सामान्य सिबें अप्वः ग्याइगु
द्यनाच्वंम्ह छक्वलं दनीगु वा लासाय् च्वं फाइगु
ग्यानापुगु म्हगस खनीगु वा छटपटि जुइगु
तःकःतक छगू हे घटना लुमनाः मन मच्वनीगु
पीर, च्यूताः कयाः दुःखी जुइगु
तनाव, असफलताया ग्याःचिकु दइगु
उदास, निराश जुयाः याकःचा च्वनाच्वनीगु
गुगु कथंया दबाबय् लाःगु महसूस यानाच्वनीगु
आत्मग्लानी जुइगु
जीवनलिसे हे वितृष्णा जुइगु
थःके सामान्यसिबें आपाः वा म्हो शक्ति वइगु महसुस जुइगु
अस्वाभाविक भावनात्मक उतार चढाव जुइगु

शारीरिक लक्षण

छाती स्याइगु, हीसे च्वनीगु वा सासः ल्हाये थाकुइगु
नुगः याकनं याकनं धुकधुक जुइगु, स्याइगु
इलय् ब्यलय् ख्वाः ह्याउँसे च्वनावइगु
इकुसे च्वनीगु, बेहोश जुइगु वा म्ह ख्वाउँसे च्वनावनीगु
आपाः चःति वइगु, ई गनीगु वा बान्ता जुइगु
म्ह याक्लाप्याक्ला वनीगु
ल्हाः तुति झमझम जुइगु वा स्याइगु
अस्वाभाविक कथं छ्यं वा म्ह स्याइगु, खाइगु

व्यावहारिक लक्षण

ज्या याये मं मदइगु वा सामाजिक ज्यायु नुगः मवनीगु
ध्यान तये मफइगु वा लुमंके मफइगु
आपाः तं पिहां वइगु
छगू हे ज्या जक तःकः यानाच्वनीगु, थम्हं थःत नियन्त्रणय् तयेमफइगु
याकःचा हालाच्वनीगु वा असामान्य ज्याखँ यानाच्वनीगु
थःत वा मेपिंत आघात जुइगु ज्याखँ याइगु
खःकथंया निर्णय यायेमफइगु

थुज्वःगु लक्षण सुयाकें दुसा व मानसिक ल्वगि नं जूवनेफु ।

छु यायेमाः ?

थुज्वःगु लक्षण खनेदुसा वा थुज्वःगु समस्या पाखें बचे जुइत सुरक्षित थासय् च्वनेगु, भविष्यय् वइगु अवस्थाप्रति सजग जुइगु, थःत जूगु घटनाबारे मेपिंलिसे खँ ल्हायेगु, खःगु सुचना हिलाबुला यायेगु, थः छेँजःपिं व थःथितिनाप नापं च्वनेगु थेंजाःगु ज्या यानादीफइ । लिसें, मनोविज्ञ, मनोचिकित्सिक वा मनोविमर्शकर्ता वा विशेषज्ञपिनि उचित परामर्श वा सेवा नं कायेफइ ।