nepal investment baink

भुखाय् मखु पराकम्प मद्युनि !

–    निश्चल

भूकम्प मखु हँ, पराकम्प हँ ! छु धाःगु थ्व ? वंगु वैशाख १२ गतेलिपा अंग्रेजीया ‘आफ्टरशक्स’यात अनुवाद यानाः पराकम्प धइगु शब्द छ्यलाहःगु आःतक नं सर्वसाधारणया न्ह्यपुइ दुहां मवंनि । अले हानं वैशाख २९ गते अपायसकं भुखाय् ब्वःगुयात नं पराकम्प हे धयादिल, थुकिं ला मेगु ‘डिस्कस’ सुरु यानाबिल । हानं असार ५ गते रुकुम केन्द्रविन्दु जुयाः ब्वःगु भुखाययात पराकम्प मखु, मेगु हे भुखाय् धयाबिल । थुकिं नं मनूतयत अलमल यानाब्यूगु खनेदु ।

भूगर्भविदतयगु धापू कथं वंगु वैशाख १२ गते गोरखाया बारपाक केन्द्रविन्दु जुयाः ब्वःगु भुखाचं पूर्वय् दोलखा तकया ‘रेञ्ज’ प्रभावित याःगु खः । थ्व हे रेञ्ज दुने वा भूकम्पीय क्षेत्र दुने ब्वःगु भुखाय् फुक्कं पराकम्पन खः । तर उगु क्षेत्रं पिने रुकुमय् ब्वःगु भुखाय् धाःसा ब्यागलं हे भुखाय् खः ।

भूगर्भविदतसें भुखायया भविष्यवाणी यायेफइमखु, व गुगुं इलय् नं ब्वयेफु धकाः धयाच्वंगु खँयात ‘जनरल स्टेटमेन्ट’या रुपय् मकासे आःया सन्दर्भय् कयाः गुलिगुलिसिनं भूगर्भविदतसें नं भुखाय् ब्वइगु खँयात नकारे मयाः, अथे जूगुलिं भुखाय् ब्वइ तिनि न्हिं धकाः नं प्रचार यानाजूगु दु । कम्युनिकेशन वा सूचना प्रवाहया थुज्वःगु पहः नेपाःया समाजय् खनेदयाच्वंगु दु । अथे जूगुलिं सही सूचना प्रवाह थौंया आवश्यकता खः । अझ धाःम्हेसिनं छु धाल धइगु खँ सिकं नं थुइकूम्हेस्यां गुकथं थुइकी, वं सही रुपं थुइकेफइगु वातावरण दयेकेगु महत्वपूर्ण ज्या खः ।

भुखाय् थुज्वःगु सम्वेदनशील विषयवस्तुइ गलत सूचना प्रवाह, गलत शिक्षा पाखें तःधंगु क्षति जूवनेफु । टेबुल क्वय् सुलेगु धइगु सुचना नं वंगु भुखाचं गलत साबित यानाबिल धाःसा न्हापाया ट्रेण्ड कथं बिस्युं वंपिं मनूत नं लाःगु खनेदत । घाःपाः जूपिं आपाः ला बिस्युं वंपिं हे दु ।

भुखायया पराकम्प जारी हे जुयाच्वंगु दु, थ्व हे इलय् सत्तीक केन्द्रविन्दु लाइबलय् चीधंगु स्केलया भुखाय् नं तच्वकं महसूस जुइगु जुयाच्वन । यदि सूचना प्रवाह मजूगु खःसा छेँखा छेँखाय् च्वं वनेधुंकूपिं मनूत तसकं भुखाय् ब्वल धकाः हानं पालय् च्वं वयेगु अवस्था वइ ।

पराकम्प नं पराकम्प वैशाख २९ या नं पराकम्प धायेबलय् हानं मनूत पराकम्प धायेवं तुं ग्यायेम्वाःगु अवस्था मखु । थ्व इलय् सतर्कता ला अनिवार्य हे खः, तर भयभीत अवस्थां धाःसा मुक्त जुइमाः व मेपिंत नं मुक्त यायेमाः ।

–०–