nepal investment baink

भुखाय् ब्वयेधुंकाः नेवाः कलाकार

- विजयरत्न असंबरे
नेवाः संकिपा ख्यःया छम्ह लोकंह्वाःम्ह कलाकार राजेन्द्रमान शाक्य छम्ह बैंक व्यवसायी नं खः अले छगू डिपार्टमेन्टल मार्टया थुवाः नं खः । वय्कः थःगु छेँय् भुखाचं छप्ति हे मस्यं । अय्सां वय्कःभाजु छेँइ् दुने द्यं वनेगु आँट मयाःनि । थःगु हे छेँया कम्पाउण्डय् टेण्ट ग्वयाः द्यनाच्वंगु दु । बरु वय्कलं उगु टेण्टय् थःगु सुविधाया निंतिं टेलिभिजन, कम्प्यूटरलगायत सकतां हलंज्वलं नं तयातःगु दु ।

राजेन्द्रमान शाक्यया थें हे तुं “राजमति” संकिपाया नकिं हिसिला महर्जन व नायः मणिराज लवटया छेँय् नं छुं मजू । वय्कःपिं निम्ह तिपु खः । मणिराजया क्षेत्रपाटीइ च्वंगु छेँ नं भुखाचं छुं मजूसां हिसिलाया किपुली च्वंगु थःछेँ नं उलि मस्यं अय्सां इपिं थौंकन्हे किपुली टेण्टय् च्वनाच्वंगु दु । १२ गते भुखाय् ब्वःबले हिसिला क्षेत्रपाटीया छेँय् हे दुगु जुयाच्वनसा उबले छेँ संकूगु लुमन कि आःतक हे म्ह चिं चिं मिंगुलिं थः छेँया कोथाय् च्वने मफुनि धकाः धालसा २९ गते भुखाय् ब्वःबले धाःसा हिसिला, मणिराजलगायत आर्यम नकःमि, हृदयप्रसाद मिश्र, धीरेन शाक्य व राजेन्द्र खड्गीपिं खोनाय् राहत इनेज्याय् लानाच्वंगु खनिं । “तुयूमति” नांयागु संकिपाया निर्देशक मनिशकुमार श्रेष्ठ व अन्तर्राष्ट्रिय नेपाल कलाकार समाजया ग्वसालय् राहत इनेत खोना थ्यंबले निक्वःगु भुखाय् ब्वःगु जुयाच्वन ।

नांजाःम्ह संकिपामि व ख्यालिम्वः, साहित्यकार रामशेखर नकःमि धाःसा भुखाय् ब्वये धुंकाः च्वनावयाच्वंगु महेश्वरी खेल मैदानया सामूहिक पाल त्वःताः थौंकन्हय् सिद्धि स्मृति प्रतिष्ठानया वृद्धाश्रमय् च्वनाच्वंगु दु । अन रामशेखर नकःमिया स्वास्थ्य परीक्षण नापनापं वासः नं जुयाच्वंगु दु ।

छखे राजेन्द्रमान शाक्य, मणिराज लवट व हिसिला महर्जन थेंज्याःपिं नेवाः कलाकारत भुखाय्या ग्याचिकुं यानाः छेँपिने टेण्टय् द्यनाच्वंगु दुसा नांजाःम्ह कलाकार रवि डंगोल धाःसा थःगु छाउनी च्वंगु छेँ बांमलाक्क भुखाचं स्यंकूबलय् छाउनीया ख्यलय् पालय् च्वने मालाच्वंगु दु । आः वय्कः भाजुयात थःगु छेँ सुरक्षित रुपं थुनाबिइपिं ग्वाहालिमि आवश्यक जूगु खँ वय्कलं कनादिल । थः भुखाचं पीडित जुयादीम्ह कलाकार निर्देशक डंगोल भुखाय्पीडितपिन्त राहत बीगु ज्याय् नं सक्रिय जुयाः न्ह्यज्यानाच्वनादीगु दु ।

“सत्य धरोधर्म”लगायत नेवाः फिल्म म्हिते धुंकूम्ह अले “मेरी बास्सै”या चम्सुरी धकाः म्हसिका दुम्ह लोकंह्वाःम्ह पल्पसा डंगोल धाःसा १२ गते भुखाय् ब्वःबलय् “मेरी बास्सै”या शुटिंगय् लानाच्वंगु खःसा शुटिंग याना च्वंगु छेँय् हे दुना वःबलय् इमित सास्ती जूगु खँ वय्कःमय्जुं कनादिल । थौंकन्हय् भुखाचं कयाः सास्ती जूपिन्त राहत इनेगु झ्वलय् सफा चर्पीया अभियानय् लगे जुयाच्वंम्ह पल्पसा डंगोल थ्वहे ज्याझ्वलय् बुधवाः नुवाकोट वनेत्यंगु दु ।
तसकं लोकंह्वाःपिं कलाकार तिपु श्यामसुन्दर शिल्पकार व अर्णेश्वरी शिल्पकारया ख्वपय् च्वंगु छेँ बांमलाक्क स्यनसा थौंकन्हय् वय्कःपिं सल्लाघारी पाल ग्वयाच्वंगु खःसा आः वय्कःपिं अस्थायी टहरा दयेकाः च्वनेगु तयारी यानाच्वंगु दु । वा वइगु मौसम सतिना वःगुलिं पालय् च्वनेगु पाय्छि मजूगुलिं अस्थायी टहराया व्यवस्था याये त्यनागु खँ श्याम सुन्दर शिल्पकारं कन ।
अथेहे हिसिला च्वनाच्वंगु टेण्टय् हिसिलाया केहेँमय्जु लोकंह्वाःम्ह म्येहालामि रत्नशोभा महर्जन नं नापं च्वनाच्वंगु दु ।

भुखाय् ब्वयाः निन्हुति थःगु छेँ पिने पालय् च्वंम्ह मञ्जु श्रेष्ठ थौंकन्हे थःगु हे छेँय् च्वनाच्वंगु दुसा थःगु कलाकारिता नं न्ह्याके धुंकूगु दु । मेकथंया मनोरञ्जन मूलक ज्या शुरु मजूनिगु थ्व इलय् भुकम्पपीडित विस्थापित परिवारया स्वास्थ्य स्थितियात कयाः छगू रेडियो प्रोग्राम बुधवाः सुथय् क्वचायेकूगु दु ।
राज्यया भाषिक विभेद नीतियात कयाः दयेकातःगु “मुद्दा”या निर्देशक रत्नकाजी महर्जन ‘लूनिभाः’ थौंकन्हय् थःगु छेँया लिउनेसं च्वंगु टहराय् च्वनाच्वंगु दुसा झस्काः, थम्हं म्हूगु गाः थेंजाःगु संकिपाया कलाकार रवि महर्जन नं किपुली हिसिला महर्जन च्वनाच्वंगु टेण्टया नापसं च्वंगु टेण्टय् थः परिवारनाप च्वनाच्वंगु दु । हिसिला व रवि महर्जनपिन्त थ्व टेण्ट नेपालमण्डल राहत अभियान व अरनिको समाजया पहलय् लुम्बिनी च्वनाबिज्याःपिं चिनिया भिक्षुपिसं बियाबिज्याःगु खः ।
अथेहे तुं “पटाचारा”या निर्देशक रामकृष्ण खड्गी छाउनी आर्मि ब्यारेकय् टेण्टय् च्वनाच्वंगु दुसा लोकंह्वाःम्ह नकिं भिंतुना जोशी भुखाय् ब्वये धुंकाः निन्हुप्यन्हु नयाँबजारया मल्टिभेन्यू पार्टी प्यालेसय् च्वंगु खःसा थौंकन्हय् थःगु हे छेँय् लिहाँ वने धुंकल । वय्क:या मां वरिष्ठ कलाकार नगिना जोशी धा:सा अातक नं उगु हे पार्टी प्यालेसय् च्वनाच्वंगु दनि।
अथेहे तुं मेम्ह लोकंह्वाःम्ह हिरोइन आशिष्मा नकःमि नं थौंकन्हय् छेँय् हे च्वनाच्वंगु दु बरु आशिष्माया मां आशा नकःमि धाःसा १२ गते भुखाय् ब्वःबलय् ब्वाँय् वंबलय् तुति त्वःधूगुलिं थौंकन्हय् अस्पतालय् वासः याकाच्वंगु दुसा आशिष्माया अबुजु संगीतकार मनराजा नकःमि धाःसा थः तिरिमय्जुया अस्पतालय् कुरुवा जुयाच्वंगु दु ।